image-2000x150px
image-prezident_150121_103backend

Bu tarix əbədi yaşayacaq – Əziz Şuşa sən azadsan!

image-728x90px

Ötən ilədək hər dəfə mayın 8-də, təxminən bu dəqiqələrdə KİV-lərdə xəbər yayımlanırdı. Hər mayın 8-də Şuşanın işğalını daha bir il hüznlə xatırlayırdıq. Düz 28 il bu acı, bu kədərlə yaşamışıq. 

Budəfəki 8 May tarixi bir başqadır, möhtəşəmdir. Çünki bu dəfə Şuşa mayın 8-ni azad şəkildə qarşılayır.

Doğru.az xatırladır ki, 1992-ci ilin mayın 8-də Ermənistan Silahlı Qüvvələri tərəfindən işğal edilən Şuşa 8 noyabr 2020-ci ildə Müzəffər Ordumuz tərəfindən azad edilib.

Elə həmin gün Ali Baş Komandan, Prezident İlham Əliyev Şuşanın işğaldan azad edilməsini Şəhidlər Xiyabanında xalqa müraciətində açıqlayıb:

“Əziz həmvətənlər, əziz bacılar və qardaşlar!

Böyük fəxarət və qürur hissi ilə bəyan edirəm ki, Şuşa şəhəri işğaldan azad edildi! Şuşa bizimdir! Qarabağ bizimdir! Bu münasibətlə bütün Azərbaycan xalqını ürəkdən təbrik edirəm. Bütün şuşalıları ürəkdən təbrik edirəm.

İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaq. Bu tarix əbədi yaşayacaq.

Bu, bizim şanlı Qələbəmizin, zəfərimizin günüdür! Bu qələbəni biz döyüş meydanında qazandıq, danışıqlar masası arxasında yox. Mən dəfələrlə demişəm, bütün bəyanatlara rəğmən ki, bu münaqişənin – Ermənistan-Azərbaycan Dağlıq Qarabağ münaqişəsinin hərbi həll yolları da vardır və bu gün biz bunu döyüş meydanında sübut edirik.

30 ilə yaxın mənasız danışıqlar bizi heç bir nəticəyə yaxınlaşdırmadı. Əzəli tarixi torpaqlarımız 30 ilə yaxın işğal altında qaldı. Danışıqlar prosesində Ermənistan tərəfi, sadəcə olaraq, vaxt udmaq istəyirdi, sadəcə olaraq, status-kvonu möhkəmləndirmək, əbədi etmək istəyirdi. Bu illər ərzində dəfələrlə Azərbaycana müxtəlif güc mərkəzlərindən göndərilən siqnallar bizi vəziyyətlə barışmağa sövq edib. Ancaq biz qətiyyət, cəsarət, siyasi iradə göstərərək, Azərbaycan xalqının maraqlarına cavab verməyən heç bir razılaşmaya getmədik.

Mən dəfələrlə bütün beynəlxalq kürsülərdən bəyan etmişdim ki, torpaqlarımızın, ərazi bütövlüyümüzün bərpa edilməsi bizim əsas vəzifəmizdir və biz bu vəzifəni icra edirik. Danışıqlar heç bir nəticə vermədi. Sadəcə olaraq, bizim başımızı aldadırdılar, sadəcə olaraq, məsələni dondurmaq istəyi müşahidə olunurdu.

Biz bu Qələbəni döyüş meydanında qazandıq, şəhidlər verərək bu Qələbəni qazandıq. Allah bütün şəhidlərimizə rəhmət eləsin! Həm birinci Qarabağ, həm ikinci Qarabağ – Vətən müharibəsi adlandırdığımız müharibədə şəhid olmuş bütün şəhidlərimizə Allahdan rəhmət diləyirəm, onların yaxınlarına səbir diləyirəm.

Yaralı soydaşlarımıza Allahdan şəfa diləyirəm. Biz xalqımızın, əsgərlərimizin, zabitlərimizin canı, qanı bahasına torpaqlarımızı işğalçılardan azad edirik. İşğalçıları torpaqlarımızdan qovuruq və qovacağıq!”

Dövlət başçısı çıxışının sonunda qeyd edib:

“Bu tarixi bir gündə Azərbaycan xalqına bu müjdəni vermək mənim həyatımda, bəlkə də, ən xoşbəxt günlərimdən biridir.

Əziz Şuşa, sən azadsan!

Əziz Şuşa, biz qayıtmışıq!

Əziz Şuşa, biz səni dirçəldəcəyik!

Şuşa bizimdir! Qarabağ bizimdir! Qarabağ Azərbaycandır!”

Bu artıq heç kimə sirr deyil ki, Azərbaycan əsgəri digər döyüşlərdə olduğu kimi, Şuşa uğrunda savaşda da böyük şücaət, qəhrəmanlıq göstərib.

Prezident İlham Əliyevin Şuşanın azad edilməsi ilə bağlı fikirlərini xatırlayaq:

“Özü də biz onların bizi haradan gözlədiklərini və nə edəcəklərini təxminən bilirdik. Buna görə də elə yerdən gedirdik ki, onların ağlına belə gəlməzdi. Onlar bizim Şuşaya necə gedib çıxmağımızı hələ də başa düşə bilmirlər.

Başa düşə bilmirlər, bir-birindən soruşurlar. Bəzən bu məsələ mətbuata çıxır. Lakin haçansa başa düşəcəklər, bu da Azərbaycanın xüsusi təyinatlılarının və digər xüsusi hərbi birləşmələrinin misilsiz mərdliyi, qəhrəmanlığı, fədakarlığı ilə bağlı ayrıca bir əhvalatdır. Lakin bu gün artıq sirr deyil ki, döyüş əməliyyatlarında sərhəd xidmətinin xüsusi təyinatlı qüvvələri, daxili qoşunlar, təhlükəsizlik xidməti, kəşfiyyat xidməti, Naxçıvan ordusunun xüsusi qüvvələri iştirak edirdilər. Onlardan hər birinin vahid komandanlıq altında öz vəzifəsi var idi.

44 gün ərzində ərazilərimizi azad etməyimizdə xüsusi təyinatlıların böyük xidməti olub. Axı dağa dırmaşmaq, aşağıdan yuxarıya qalxmaq lazımdır. Şuşanın alınması isə, ümumiyyətlə, ayrıca dastandır, bəli, bu, epos kimidir. Ona görə ki, döyüşçülər nə götürə bilərdilərsə, götürməliydilər, amma özünlə nə götürə bilərsən? Maksimum qumbaraatan.

Bu, inanılmaz fiziki qüvvə, hazırlıq tələb edir. Bu sal qayalara aşağıdan dırmaşmaq lazımdır. Müdafiə xətləri çox möhkəmlənib, özü də orada ermənilərin tankları və topları vardı. Bizdə isə süngü-bıçaqlar və yüngül silah”.

Maraq üçün bildirək ki, Azərbaycanın qədim şəhəri uğrunda döyüşlərdə iştirak edənlərdən 4646 hərbçimiz Prezident tərəfindən “Şuşanın azad olunmasına görə” medalı ilə təltif edilib.

Şuşa işğaldan azad edildikdən sonra Prezident İlham Əliyev mədəniyyət beşiyimizə səfərlər edib. Bu səfərlərin birində Şuşanın simvollarından sayılan, işğal zamanı zədələnmiş və Bakıya gətirilmiş üç dahi şəxsiyyətin heykəli Şuşaya qaytarılıb. İllərdir “Güllələnmiş heykəllər” adlandırılan Üzeyir Hacıbəyli, Bülbül və Natəvanın heykəlləri ölkə başçısının ailəsinin Şuşaya səfəri ərəfəsində doğma yurdunda, aid olduğu yerə qoyulub.

Bu gün Şuşada artıq yenilənmə işləri gedir. Mədəniyyət beşiyi olan şəhərdə bir sıra tarixi binalar, yaşayış məntəqələri, abidələr restavrasiya olunur. Şuşaya yeni Zəfər yolu çəkilir. Bir sözlə, şuşalıların Şuşaya qayıtması üçün gücləndirilmiş rejimdə iş gedir.

Ötən gün isə Prezident İlham Əliyev Şuşa şəhərinin Azərbaycanın mədəniyyət paytaxtı elan edilməsi haqqında sərəncam imzalayıb.

Bir sözlə, budəfəki 8 May bir başqadır. Bu dəfə, həqiqətən, Vətən bağı al-əlvandır. Ətrin gəlir, Xarı bülbül!

İlqam Cebiyev  DOĞRU.AZ

image-728x90px

  • whatsapp
  • messenger
  • telegram
  • vkontakte
  • odnoklassniki