Bu il Balakən rayonunun 7 min hektaradək sahələrində qarğıdalı əkilməsi proqnozlaşdırılır. Bir neçə gündür ki, rayonun Talalar, Mahamalar və Qazma kəndlərinin ərazilərindəki təsərrüfatlarda qarğıdalı əkininə başlanılıb. Fermerlər qısa müddətdə 100 hektaradək sahəyə qarğıdalı əkiblər.
Bu barədə Balakən Dövlət Aqrar İnkişaf Mərkəzinin bitkiçilik sektorunun müdiri Şahin Rəhimli məlumat verib.
Sektor müdiri bildirib ki, təsərrüfat sahibləri əkin zamanı Türkiyədə istehsal olunan və yüksək məhsuldarlığı ilə seçilən toxum sortlarına üstünlük verirlər: “Fermerlər toxumu rayonda fəaliyyət göstərən satış məntəqələrindən əldə edirlər”.
Qeyd edək ki, qarğıdalı istehsalı Balakən rayonunun kənd təsərrüfatında aparıcı yerlərdən birini tutur. Hazırda Balakən qarğıdalı bitkisinin əkin sahəsinə və istehsal olunan məhsulun həcminə görə respublikada ön sırada yer alır. Ötənilki mövsümdə balakənli fermerlər 6 min 942,7 hektar sahədən 46 min 250 ton qarğıdalı tədarük ediblər. Hər hektardan orta hesabla 66,6 sentner məhsul götürülüb.
DOĞRU.AZ
