image-2000x150px
image-3w8c4626backend

Bakıda “B&B Security Alliance” şirkətinin təşkilatçılığı ilə beynəlxalq konfrans keçirilib – FOTO

image-728x90px

Bakıda “B&B Security Alliance” şirkətinin təşkilatçılığı ilə “Effektiv kibertəhlükəsizlik” mövzusunda beynəlxalq konfrans keçirilib.

Sentyabrın 28-də Bakıda keçirilən konfransda informasiya təhlükəsizliyi sahəsində Azərbaycan və Türkiyədən olan ekspertlər, eləcə də kibertəhlükəsizlik sahəsində dünyanın və qardaş Türkiyənin istehsalçı şirkətlərinin nümayəndələri iştirak ediblər.

Konfransda “Bestcomp Group” şirkətinin Müşahidə Şurasının sədri Rauf Həsənov, “Barikat” şirkətinin baş direktoru Murat Hüseyin Candan, Azərbaycan Kibertəhlükəsizlik Təşkilatları Assosiasiyasının İdarə Heyətinin sədri Rahid Ələkbərli, “B&B Security Alliance” şirkətinin texniki direktoru Məmməd Məmmədov, Olta.la şirkətinin baş direktoru Mehmet Çakır, “Forcepoint” şirkətinin regional satış meneceri Umut Can Yalçın, “CyberArk” həllər üzrə mühəndis Özgün Öztürk, “CyberArk” Türkiyə və Orta Asiya ölkələri üzrə regional satış meneceri Esra Çalışkan, “Branddefense” baş direktoru Mehmet Caner Köroğlu, “Fortinet”in Azərbaycan, Gürcüstan, Türkmənistan üzrə regional satış meneceri Şaiq Səmədov və başqa ekspertlər iştirak ediblər.

Açılış nitqi ilə çıxış edən “Bestcomp Group” şirkətinin Müşahidə Şurasının sədri Rauf Həsənov konfrans iştirakçılarını salamlayıb və “B&B Security Alliance” şirkətinin “Bestcomp Group” və Türkiyənin “Barikat Cyber ​​​​Security” şirkəti tərəfindən yaradılmış birgə müəssisə olduğunu diqqətə çatdırıb. R.Həsənov 2019-cu ildə yaradılan bu müəssisənin regionda kibertəhlükəsizlik sahəsində ən son texnologiyaları və türk tərəfdaşlarının bu sahədə zəngin təcrübəsini ölkəmizə gətirdiyini bildirdi.

“Barikat” şirkətinin baş direktoru Murat Hüseyin Candan isə informasiya təhlükəsizliyi sistemlərinin qurulması sahəsində malik olduqları zəngin təcrübələri, Türkiyədə və dünyada reallaşdırdıqları bir sıra böyük kibertəhlükəsizlik həlləri və xidmətləri barədə tədbir iştirakçılarına məlumat verib.

Azərbaycan Kibertəhlükəsizlik Təşkilatları Assosiasiyasının İdarə Heyətinin sədri Rahid Ələkbərli mövzu üzrə çıxış edərək, bu gün Azərbaycanda fəal şəkildə gedən rəqəmsal transformasiya prosesləri, kibertəhlükəsizliyin yüksək səviyyədə təşkilinə xüsusi diqqət çəkib:

“Bu gün informasiya texnologiyaları və informasiya təhlükəsizliyi sahəsində ixtisasa yiyələnməyə can atan gənc kadrlar kifayət qədər çoxdur. Bu gənclərin peşəkar kadr kimi yetişdirilməsində türkiyəli mütəxəssislərin dəstəyinə böyük ümid bəsləyirik”.

“B&B Security Alliance” şirkətinin texniki direktoru Məmməd Məmmədov qonaqlara rəqəmsal transformasiya, postpandemiya və kibermüharibələrin kibertəhlükəsizlikdə yaratdığı yeni çağırışlar haqqında məlumat verib. M.Məmmədov yaranan kibertəhdidlərlə mübarizədə həll yolları haqqında danışıb və “B&B Security Alliance” şirkətinin həll və xidmətlərinin çox effektiv olacağını iştirakçıların diqqətinə çatdırıb. O qeyd edib ki, şirkətin yalnız Azərbaycan bazarında deyil, eyni zamanda “Bestcomp Group” şirkətinin çoxsaylı layihələr həyata keçirdiyi qonşu ölkələrdə də xidmətlər və həllər portfeli mövcuddur:

“Bundan əlavə, Bakı, Ankara, İstanbul və Dohada SOC mərkəzlərimizin olması müştərilərə yaranan təhlükələrə ən yüksək səviyyədə cavab verilməsinə zəmanət verir. Şirkətimizin informasiya təhlükəsizliyi üzrə 300-dən çox sertifikatlı mütəxəssislərinin potensialı, səriştə və təcrübəsi bizə kibertəhlükəsizlik üzrə ən mürəkkəb sistemlərin qurulması, müxtəlif məsləhət xidmətlərinin verilməsi, fərqli auditlərin keçirilməsi və s. kimi xidmətlər göstərməyə imkan verir”.

Hazırda “B&B Security Alliance” tərəfdaşlarının məhsul portfelinə kibertəhlükəsizlik sahəsində dünyaca məşhur 20-yə yaxın istehsalçının məhsulları daxildir. Şirkətin müştəriləri arasında ölkənin bir sıra dövlət və özəl müəssisələri yer almaqdadır.

Tədbirin ikinci hissəsi kibertəhlükəsizlik bazarında innovativ xidmətlər təklif edən dünyanın və Türkiyənin aparıcı istehsalçılarının məhsullarının təqdimatına həsr olunub.

Konfrans çərçivəsində informasiya təhlükəsizliyi sistemləri, kibertəhlükəsizlik, gənc kadrların yetişdirilməsi, innovativ xidmətlər və s. mövzular ətrafında mütəxəssislərin fikirləri dinlənilib və geniş fikir mübadiləsi aparılaraq perspektivlər qiymətləndirilib.

Konfransın sonunda qonaqlarla xatirə şəkilləri çəkdirilib.

 

image-728x90px

  • whatsapp
  • messenger
  • telegram
  • vkontakte
  • odnoklassniki