İsrail Qəzza zolağında xəstəxanalardakı tibb işçilərini atəşə tutmaqda məsuliyyət daşıyır.
Bu barədə BMT-nin İnsan Haqları üzrə Ali Komissarlığının 7 oktyabr 2023-cü il və 2024-cü ilin iyun ayları arasında Qəzzada xəstəxanalara edilən hücumlarla bağlı hesabatında deyilir.
Qeyd olunur ki, 2023-cü ilin dekabrında İsrail ordusunun şəxsi heyəti dəfələrlə həqiqi sursatdan istifadə edib və bu, Əl-Avda xəstəxanasının əməkdaşlarının ölümünə səbəb olub. Bundan əlavə, 31 yanvar 2024-cü ildə Əl-Amal xəstəxanasına hücum zamanı tibb işçilərinin ölümü qeydə alınıb.
“Yuxarıda təsvir edilən insidentlərin heç birində qurbanların birbaşa döyüş əməliyyatlarında iştirak etdiyini göstərən məlumat olmayıb”, – RİA Novosti bəyanatın mətnindən sitat gətirir.
Daha əvvəl bildirilmişdi ki, Qəzzanın şimalındakı sonuncu böyük tibb müəssisəsi olan Kamal Advan xəstəxanası dekabrın 27-də İsrail ordusunun reydindən sonra fəaliyyətini dayandırıb.
DOĞRU.AZ
