Avqustun 26-da Heydər Əliyev Fondunun prezidenti Mehriban Əliyevanın təşəbbüsü ilə Bakının müxtəlif əyləncə məkanlarında uşaqlar üçün şənliklər təşkil edilib.
Doğru.az xəbər verir ki, tədbirdə şəhid övladları, valideyn himayəsindən məhrum, internat məktəblərində tərbiyə alan, sağlamlıq imkanları məhdud və xüsusi qayğıya ehtiyac duyan uşaqlar iştirak edib.
Uşaqlar istirahət məkanlarına xüsusi avtobuslarla gətirilmiş, müxtəlif oyunlarda, ustad dərslərində, rəqs və köpük şouda iştirak etmiş, hovuzda doyunca əylənmiş, günboyu davam edən tədbirlər çərçivəsində nahar süfrəsindən istifadə etmişlər. Ad günləri həmin günə təsadüf edən uşaqlar isə bu özəl günü həmyaşıdları ilə birlikdə şənlənərək qeyd ediblər.
Tədbirin yekununda hər bir uşağa Fondun hədiyyələri təqdim olunub. Şənlikdə iştirak edənlərdən biri də Vətən müharibəsi şəhidi Şəhriyar Quliyevin 9 yaşlı oğlu Camal Quluzadə olub. O, tədbirdə vaxtını səmərəli keçirdiyini və yeni dostlarla tanış olduğunu bildirib.
Həmçinin, 2023-cü ilin sentyabrında antiterror əməliyyatları zamanı Xocalı istiqamətində şəhid olan polkovnik-leytenant Əkbər Şadmanovun oğlu Araz Şadmanzadə və səkkiz yaşlı Zəhra Quliyeva, on üç yaşlı Adil Həsənov da tədbirdən razılıqlarını ifadə edərək Fondun təşəbbüsünü yüksək qiymətləndiriblər.
Qeyd olunub ki, Heydər Əliyev Fondu valideyn himayəsindən məhrum və xüsusi qayğıya ehtiyacı olan uşaqların, həmçinin şəhid övladlarının daim diqqətdə saxlanılmasını təmin edir, onların sosial müdafiəsinin gücləndirilməsi və əyləncəli tədbirlərlə təmin olunması istiqamətində fəaliyyətini davam etdirir.
DOĞRU.AZ
