Səhiyyə Nazirliyi Analitik Ekspertiza Mərkəzi tərəfindən 2024-cü ilin birinci rübü ərzində özəl tibb müəssisələrində 32 planlı yoxlama, 55 plandankənar yoxlama və 8 araşdırma keçirilib.
Doğru.az nazirliyə istinadən xəbər verir ki, bu yoxlamalar zamanı özəl tibb müəssisələrində aşkar edilən qanun pozuntuları ilə əlaqədar 46 protokol tərtib edilib.
Bu müddət ərzində 1 özəl tibb müəssisəsində – “Medicare Klinikası” MMC -də lisenziyadan kənar fəaliyyət aşkar edilməsi və verilən vaxt ərzində nöqsanların aradan qaldırılmaması səbəbindən Səhiyyə Nazirliyinin rəyi ilə İqtisadiyyat Nazirliyi tərəfindən sözügedən klinikanın lisenziyasının dayandırılması barədə qərar qəbul edilib.
Xatırladaq ki, bu ilin əvvəlində sözügedən klinika ölüm faktı ilə əlaqədar gündəmə gəlmişdi. Pasiyentin “Mediacare” klinikasında ölməsi ilə bağlı Sabunçu Rayon Prokurorluğunda araşdırmaya başlanılmışdı.
Qeyd edək ki, “Medicare” klinikası Sabunçu rayonu, Sabunçu qəsəbəsi, Ə.Məmmədəliyev küçəsi 5 ünvanında yerləşir.
DOĞRU.AZ
