İyulun 22-də Bakıda Medianın İnkişafı Agentliyi tərəfindən Azərbaycan milli mətbuatının 150 illik yubileyi münasibətilə rəsmi tədbir təşkil olunub.
Doğru.az xəbər verir ki, tədbirin əvvəlində Azərbaycan Respublikasının Prezidenti İlham Əliyevin milli mətbuatın 150 illik yubileyi ilə bağlı media nümayəndələrinə ünvanladığı müraciət səsləndirilib. Prezidentin müraciətini Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev oxuyub.
Daha sonra bir qrup media nümayəndəsinə Prezident İlham Əliyevin müvafiq Sərəncamı ilə təsis edilmiş “Azərbaycan milli mətbuatının 150 illiyi (1875–2025)” yubiley medalı təqdim olunub.
Tədbirdə həmçinin yubileyə həsr edilmiş videoçarx nümayiş etdirilib və proqram bədii hissə ilə davam edib.
Yubiley mərasimində televiziya kanallarının, informasiya agentliklərinin, aparıcı çap və onlayn media subyektlərinin rəhbərləri, ictimaiyyət nümayəndələri iştirak ediblər.
DOĞRU.AZ
