“Son zamanlar İran adlanan dövlətin həm regiondakı hadisələrdə, həm də Rusiyanın Ukraynaya qarşı işğalçı müharibəsində təcavüzkarın yanında yer almasını qətiyyətlə pisləyirik. Bəyan edirik ki, Ukraynada minlərlə günahsız insanın ölümünə, eyni zamanda milyonlarla insanın öz yurd-yuvasından didərgin düşməsinə işğalçı Rusiya ilə əlbir olan İran da məsuliyyət daşıyır”.
Bu barədə Ukrayna Azərbaycanlıları Birləşmiş Diasporu (UABD) İdarə Heyətinin İranda baş verən hadisələr və İranın regionda yaratdığı təhdidlə bağlı bəyanatında deyilir.
Qeyd olunur ki, İran dövləti bu cinayətkar əməlləri ilə gücü tükənməkdə olan işğalçı Rusiyaya nəfəs verir və onun təcavüzkarlıq niyyətinin gerçəkləşdirilməsinə bilərəkdən kömək edir:
“Rusiyaya silah satdıqlarını etiraf edən İran rəsmilərinin bu hərəkəti beynəlxalq təşkilatlar və ictimaiyyət tərəfindən diqqətə alınmalı, adekvat tədbirlər görülməlidir. Əks təqdirdə Rusiyanı silahla təchiz edən, Vətənimiz Azərbaycanı isə sərhəddə hərbi təlim keçməklə təhdid edən İranın bu aqressiyası davamlı xarakter alacaq.
Ermənistanla Azərbaycan arasında arzulanan sülh müqaviləsinin imzalanmasının gecikdirilməsində Rusiya qədər İranın da mühim rol oynadığı heç kimə sirr deyil. İran erməni təcavüzkarlığına dəstək verərək Azərbaycanın işğal altında olan sərhəd boyu kənd, şəhər və rayonlarını talayıb, yurd yerlərimizin viran qoyulmasında iştirak edib. Bu azmış kimi, İkinci Qarabağ savaşında Ermənistana həm maddi, həm də mənəvi dəstək verərək işğalçıya haqq qazandırıb, Azərbaycanın qələbəsini qısqanclıqla qarşılayıb”.
Bəyanatda daha sonra bildirilir ki, İranın daxilində baş verən son hadisələrdə Cənubi Azərbaycanda yaşayan 40 milyondan artıq soydaşımızın hüquqları kobud şəkildə pozulur, fəal gənclərimiz həbs olunur və qətlə yetirilirlər:
“Uzun illərdir təməl milli hüquqlarından məhrum olan soydaşlarımız ana dildə təhsil ala, müstəqil media qurumları aça bilmir və bu kimi sosial-mədəni yaşam imkanlarının üzünə həsrətdirlər.
Fars-molla rejimi şovinist siyasəti ilə soydaşlarımızı sıxışdırır, onların milli hüquqlarını tapdalayır, Azərbaycan dilinin inkişafını, cəmiyyətdə layiqli mövqe tutmasını əngəlləyir, mədəniyyətimizin, milli-mənəvi dəyərlərimizin aşınmasına bais olur. Bütün bu haqsızlıqlara etiraz edən azərbaycanlılar ən ağır cəzalara məruz qalırlar.
İranda hakimiyyəti qəsb edən fars-molla rejimi bununla da kifayətlənməyərək zülmə etiraz səsini ucaldaraq ayağa qalxan xalqa qarşı zor işlətməyə davam edir. Bununla yanaşı, vaxtilə İrana zorla tabe etdirilmiş Cənubi Azərbaycanda da milli azadlıq hərəkatı zor gücü ilə boğulur, yaranmaqda olan Türk Birliyi ideyasının gerçəkləşməsinə zərbə vurulur.
Beynəlxalq ictimaiyyət bütün bunları əsas götürərək sivil dünya düzənini Rusiya-İran təhdidindən xilas etməlidir.
Ukraynada yaşayan UABD üzvləri olaraq hər zaman olduğu kimi, bundan sonra da cənublu soydaşlarımızın yanında olacağımızı bəyan edir, onların haqq səsinə səs verir, eyni zamanda digər ölkə və şəhərlərdə yaşayan Azərbaycan diaspor təşkilatlarını da bu bəyanata qoşulmağa dəvət edirik”, – UABD-nin bəyanatında vurğulanır.
DOĞRU.AZ
