Braziliyanın Belem şəhərində keçirilən COP30 iqlim konfransında diqqət mərkəzində duran əsas mövzulardan biri növbəti konfrans – COP31-in ev sahibliyini hansı ölkənin edəcəyidir.
Doğru.az xəbər verir ki, müzakirələr hazırda dalana dirənib və yekun seçim hələ razılaşdırılmayıb.
COP31-ə ev sahibliyi üçün uzun müddət əsas namizəd sayılan Avstraliya, Sakit okean adaları ilə birgə sammit keçirməklə iqlim dəyişikliyinə qarşı fəaliyyətini və regiondakı diplomatik mövqeyini gücləndirməyi hədəfləyir. Ölkə kömür və qazdan asılılığını azaltmaq, bərpa olunan enerji, yaşıl polad və batareya texnologiyalarına sərmayəni artırmaq üzərində çalışır.
Yeni Cənubi Uels Universitetinin iqlim üzrə eksperti Uesli Morqan Reuters agentliyinə bildirib ki, COP-a ev sahibliyi Avstraliya üçün həm diplomatik, həm də iqtisadi baxımdan böyük əhəmiyyət daşıyır.
Son həftələrdə isə Türkiyə prosesi aktivləşdirərək alternativ namizəd kimi irəli çıxıb. Ankara sammitin inkişaf etməkdə olan ölkələrin iqlim maliyyələşməsinə diqqəti artırmalı olduğunu və 2053-cü ilə qədər “sıfır emissiya” məqsədinə nail olmaq üçün öz səylərini təqdim etməyə hazır olduğunu açıqlayıb. Türkiyə rəsmiləri bildirirlər ki, Aralıq dənizi hövzəsində belə bir tədbirin keçirilməsi həm ekoloji, həm də logistika baxımından səmərəli ola bilər.
Nəticədə COP30-da Avstraliya və Türkiyə arasında diplomatik durğunluq yaranıb. Müşahidəçilər kompromis variantı kimi sammitin mərhələlərinin iki ölkə arasında bölüşdürülməsini təklif etsələr də, hələlik rəsmi qərar yoxdur.
BMT-nin qaydalarına görə, ev sahibliyi edəcək ölkələrin hamısı yekdil qərar qəbul etməlidir. Əgər razılıq əldə olunmasa, tədbir avtomatik olaraq BMT-nin İqlim Katibliyinin yerləşdiyi Almaniyanın Bonn şəhərində keçiriləcək. Almaniya “zərurət olarsa ev sahibliyi edə bilərik, amma bunu istəmirik” bəyanatını verib.
Belemdə COP30 zamanı Avstraliya və Türkiyə pavilyonlarının yan-yana yerləşməsinə baxmayaraq, danışıqlarda hələlik yaxınlaşma qeydə alınmayıb. Mütəxəssislər qeyd edirlər ki, COP31-in ev sahibi barədə veriləcək qərar yalnız təşkilati məsələ deyil, həm də qlobal iqlim diplomatiyasının növbəti mərhələsinə təsir göstərəcək strateji addımdır.
DOĞRU.AZ
