Mayın 10-da Dövlət Bayrağı Meydanında Dövlət Sərhəd Xidməti (DSX) Akademiyasının növbəti buraxılış mərasimi keçirilib. Tədbir Ümummilli Lider Heydər Əliyevin 102-ci ildönümünə həsr olunub.
DSX-dən Doğru.az-a bildirilib ki, mərasim iştirakçıları əvvəlcə Fəxri xiyabanda Ulu Öndərin xatirəsini yad ediblər. Tədbirdə şəhidlərin ruhu bir dəqiqəlik sükutla anılıb, Dövlət Himni səsləndirilib.
DSX rəisi general-polkovnik Elçin Quliyev çıxışında Prezident İlham Əliyevin rəhbərliyi ilə sərhədlərin qorunmasında əldə olunan uğurları vurğulayıb. O, sərhədçilərin yüksək peşəkarlıq və vətənpərvərlik nümunəsi göstərdiyini bildirib.
Tədbirdə məzunlara diplomlar təqdim olunub, gənc zabitlər “Sərhədçi zabit andı” içiblər. Bu il DSX Akademiyasını 168 kursant bitirib, onlardan 5-i təhsilini qırmızı diplomla başa vurub.
Mərasimin sonunda Elçin Quliyev gənc zabitləri və onların valideynlərini təbrik edib.
DOĞRU.AZ
