Bu gün İctimai Televiziyanın (İTV) fəaliyyətə başlamasından 20 il ötür.
Doğru.az xəbər verir ki, Prezident İlham Əliyev 2004-cü il noyabrın 5-də “İctimai Televiziya və Radio Yayımı haqqında” Azərbaycan Respublikası Qanununun tətbiqi barədə fərman imzalayıb. Bununla da Azərbaycanda İctimai Televiziya və Radio Yayımları Şirkətinin yaradılmasına hüquqi əsas formalaşıb.
2005-ci il avqustun 29-da isə Prezident İlham Əliyevin xeyir-duası ilə İctimai Televiziya efirə çıxıb. Yeni kanalın açılışı ölkəmizin demokratik inkişaf yoluna, fikir plüralizminə, söz və mətbuat azadlığı prinsiplərinə sadiqliyinin təsdiqi olub.
İctimai yayımçı hazırladığı proqramlarda cəmiyyətdəki siyasi baxışların, dini inancların, ictimai fikrin müxtəlifliyini, habelə bütün vətəndaşların hüquq bərabərliyini nəzərə alır. Televiziyanın bütün verilişləri milli-mənəvi dəyərləri, adət-ənənələri, mədəniyyət və incəsənətin rəngarəngliyini əks etdirir.
Avropa Yayım İttifaqının üzvü olan İctimai Televiziyanın verilişləri 24 saat ərzində Azərbaycan dilində yayımlanır və ölkənin bütün ərazisini əhatə edir.
Hazırda İTV-nin baş direktoru Balakişi Qasımovdur. O, bu vəzifəni 2018-ci il mayın 11-dən icra edir.
Doğru.az olaraq həmkarlarımızı bu əlamətdar gün münasibətilə təbrik edirik!
DOĞRU.AZ
