Azərbaycan ilə Serbiya respublikalarının Müdafiə nazirlikləri arasında imzalanmış ikitərəfli hərbi əməkdaşlıq planına əsasən, Serbiya Müdafiə Nazirliyinin nümayəndə heyəti ölkəmizdə səfərdə olub.
Müdafiə Nazirliyindən Doğru.az-a verilən məlumata görə, səfər çərçivəsində nümayəndə heyətinin iştirakı ilə Milli Müdafiə Universitetinin Hərbi İdarəetmə İnstitutunun Hərb Oyunları Mərkəzində görüş keçirilib.
Görüşdə bildirilib ki, Azərbaycan və Serbiya Müdafiə nazirlikləri arasında imzalanmış əməkdaşlıq haqqında Saziş, ikitərəfli planlar və strateji tərəfdaşlığın gücləndirilməsi istiqamətində aparılan müzakirələr iki ölkə arasında müdafiə sahəsində əlaqələrin inkişafında mühüm mərhələdir.
Qeyd olunub ki, qarşılıqlı səfərlər və bu cür görüşlər Azərbaycan və Serbiya arasında hərbi əməkdaşlığın möhkəmlənməsinə xüsusi töhfə verir. Həmçinin ikitərəfli plan çərçivəsində həyata keçirilən tədbir və təlimlər tərəfdaşlığın inkişafına xidmət edir.
Görüşdə “Əməliyyatların planlaşdırılması” mövzusunda brifinqlər təqdim olunub, müzakirələr aparılıb və qonaqlara Azərbaycan Ordusunun müasir formalaşması, həyata keçirilən islahatlar, tədris müəssisələri və döyüş hazırlığı barədə ətraflı məlumat verilib.
Sonda nümayəndə heyətinə xatirə hədiyyələri təqdim olunub.
DOĞRU.AZ
