Gürcüstanın paytaxtı Tbilisinin mərkəzi rayonunda yerləşən “Kidobani” ticarət mərkəzində yanğın hadisəsi baş verib. İlkin məlumata görə, yanğın ticarət mərkəzində fəaliyyət göstərən mağazalardan birində başlayıb.
Doğru.az xəbər verir ki, “Rustavi 2” televiziya kanalı Gürcüstan Daxili İşlər Nazirliyinin Fövqəladə Halların İdarə Edilməsi Xidmətinə istinadən bildirib ki, yanğın barədə məlumat daxil olduqdan sonra xilasedici qüvvələr operativ şəkildə hadisə yerinə cəlb olunub.
TASS-ın məlumatına görə, Gürcüstan DİN-in Fövqəladə Halların İdarə Edilməsi Xidmətinin rəhbəri Temur Mqebrişvili bildirib ki, yanğınsöndürmə və xilasetmə qrupları çağırışdan təxminən beş dəqiqə sonra hadisə yerinə çatıb.
“Bu vaxta qədər yanğın tamamilə söndürülüb. Yanğınsöndürmə və xilasetmə qrupları hadisə yerinə çox qısa müddətdə çataraq alovun genişlənməsinin qarşısını alıblar”, – deyə Temur Mqebrişvili qeyd edib.
Məlumata görə, yanğının söndürülməsi üçün hadisə yerinə ümumilikdə 17 yanğınsöndürmə maşını cəlb olunub. Təhlükəsizlik məqsədilə ticarət mərkəzindən təxminən 20 nəfər təxliyə edilib. Xoşbəxtlikdən, hadisə nəticəsində xəsarət alan olmayıb.
Yanğın nəticəsində restoranlardan birinin təxminən 300 kvadrat metrlik sahəsinin tamamilə yandığı bildirilir. Maddi ziyanın həcmi ilə bağlı dəqiq məlumat verilməyib.
Hazırda yanğının başvermə səbəbləri araşdırılır, müvafiq qurumlar tərəfindən istintaq aparılır. Rəsmi qurumlar hadisə ilə bağlı əlavə məlumatın veriləcəyini bildiriblər.
DOĞRU.AZ
