ABŞ prezidenti Donald Trampın Qazaxıstan mallarının idxalına 25 faizə qədər əlavə rüsum tətbiq olunacağı ilə bağlı məktubuna Qazaxıstan prezidenti Kasım-Jomart Tokayev cavab verib.
Doğru.az xəbər verir ki, Tokayev məktubunda ABŞ-la ədalətli və qarşılıqlı faydalı ticarət əlaqələrinin tərəfdarı olduğunu qeyd edib və mövcud vəziyyətin kompromislə həll olunacağına ümid etdiyini bildirib.
Qazaxıstan Prezidentinin mətbuat xidmətinin yaydığı məlumata görə, dövlət başçısı ölkəsinin ABŞ-la əməkdaşlıqda maraqlı olduğunu vurğulayıb.
Xatırladaq ki, ABŞ 14 ölkəyə qarşı əlavə ticarət rüsumları tətbiq etmək qərarı verib. Qazaxıstanın Ticarət Nazirliyi isə cavab tədbirlərinin mümkünlüyünü istisna etməyib.
DOĞRU.AZ
