Yuxu insan sağlamlığı üçün həyati əhəmiyyət kəsb edən prosesdir. Uzun müddət yuxusuz qalmaq bir çox xəstəlik riskini artırır və orqanizmin normal fəaliyyətini pozur.
Doğru.az xəbər verir ki, mütəxəssislər bildirirlər ki, yuxusuzluq təkcə gündəlik yorğunluğa səbəb olmur, həm də ciddi sağlamlıq problemlərinə yol açır.
Yuxusuzluq ürək-damar sistemi üçün xüsusilə təhlükəlidir. Daimi yuxu çatışmazlığı qan təzyiqini yüksəldə, ürək ritmini poza və infarkt riskini artıra bilər. Bundan başqa, yuxusuzluq metabolizmə mənfi təsir göstərərək şəkərli diabet və piylənmə riskini artırır.
Beyin funksiyaları da yuxusuzluqdan əziyyət çəkir. Diqqət və yaddaş pozğunluqları, qərar vermə qabiliyyətinin zəifləməsi, stress və depressiya halları yuxu çatışmazlığı ilə birbaşa əlaqəlidir. Uzun müddət davam edən yuxusuzluq, eləcə də psixi sağlamlığı pozaraq anksiyete və panik atak riskini yüksəldə bilər.
İmmunitet sistemi də yuxusuzluqdan ciddi təsirlənir. Yuxu çatışmazlığı orqanizmin infeksiyalara qarşı müqavimətini azaldır və bədənin bərpa proseslərini ləngidir. Mütəxəssislər hər gecə 7–9 saat yuxu almanın sağlam həyat üçün vacib olduğunu vurğulayırlar.
Mütəxəssislər həmçinin tövsiyə edirlər ki, yuxusuzluq əlamətləri olan insanlar mütləq həyat tərzini dəyişsin, stressi azaltsın, fiziki aktivliyi artıraraq və düzgün qidalanaraq yuxu keyfiyyətini yaxşılaşdırsın. Bu, həm fiziki, həm də psixi sağlamlığın qorunması üçün həyati əhəmiyyət daşıyır.
Yuxusuzluğun ciddi nəticələrindən qorunmaq üçün gündəlik rutinə diqqət yetirmək, elektron cihazlardan uzaq durmaq və yuxu gigiyenasına əməl etmək önəmlidir. Yalnız belə halda orqanizm özünü bərpa edə, xəstəlik risklərini minimuma endirə bilər.
İlqam Cəbiyev
DOĞRU.AZ
