Müslüm Maqomayev adına Azərbaycan Dövlət Akademik Filarmoniyası 2024–2025-ci il konsert mövsümünü simfonik orkestrin yubiley konserti ilə başa vurub.
Doğru.az xəbər verir ki, Filarmoniyanın Yay zalında keçirilən tədbir Üzeyir Hacıbəyli adına Azərbaycan Dövlət Simfonik Orkestrinin 105 illiyinə həsr olunub.
Konsertdə Üzeyir Hacıbəylinin “Koroğlu” operasından uvertüra, Arif Məlikovun piano və orkestr üçün konsertindən fraqmentlər, Fikrət Əmirovun “Şənlik” rəqsi, Qara Qarayevin “Alban rapsodiyası” və Müslüm Maqomayevin “Təntənəli marş”ı səsləndirilib. Sonda Niyazinin “Rast” simfonik muğamı və “Vals” əsəri ifa olunub.
Orkestri Fuad İbrahimov və Mustafa Mehmandarov idarə ediblər. Konsert sonunda çıxış edən Fuad İbrahimov kollektivi təbrik edib. Bakı Musiqi Akademiyasının rektoru, Xalq artisti Fərhad Bədəlbəyli orkestrin Azərbaycan musiqisini dünyaya tanıtdığını vurğulayıb.
DOĞRU.AZ
