SberZdorovye tibb şirkətinin endokrinoloqu Daria Pronina bildirib ki, mövsümündə yığılmış təzə giləmeyvələr qida maddələrinin maksimum konsentrasiyasına malik olur və insan sağlamlığı üçün son dərəcə faydalıdır.
Doğru.az xəbər verir ki, giləmeyvələr vitaminlər, liflər, üzvi turşular və flavonoidlər – təbii antioksidantlarla zəngindir. Bu maddələr orqanizmi zərərli təsirlərdən qoruyur və bəzi hallarda xəstəliklərin yaranma riskini azalda bilər.
“Bəzi araşdırmalar göstərir ki, flavonoidlərin müntəzəm qəbulu döş xərçəngi riskini bir qədər azalda bilər. C vitamini də dərinin, bağ toxumalarının və oynaqların sağlamlığına müsbət təsir göstərir. Zoğalda olan üzvi turşular isə qadınlarda həzm sisteminin fəaliyyətini yaxşılaşdırmağa kömək edir”, – deyə Pronina qeyd edib.
Onun sözlərinə görə, əgər təzə giləmeyvə əldə etmək mümkün deyilsə, şəkərsiz qurudulmuş və ya dondurulmuş variantlardan da istifadə oluna bilər. Əks göstəriş olmadıqda, gündə 150-200 qram müxtəlif növ giləmeyvə qarışığı qəbul etmək tövsiyə olunur.
Həkim həmçinin bildirib ki, giləmeyvələrin faydasını artırmaq üçün onları sağlam yağlarla birlikdə istehlak etmək məqsədəuyğundur. Məsələn, çiyələk ilə yunan qatığının birləşməsi vitamin və antioksidantların mənimsənilməsini gücləndirir.
Bununla belə, Pronina xəbərdarlıq edib ki, bəzi xəstəlikləri olan insanlar giləmeyvələri pəhrizlərinə daxil etməzdən əvvəl mütləq həkimlə məsləhətləşməlidirlər.
DOĞRU.AZ
