Belarus prezidenti Aleksandr Lukaşenko idmançıların 2024-cü ildə Parisdə keçiriləcək Yay Olimpiya Oyunlarına neytral statusda səfəri ilə bağlı mövqeyini açıqlayıb.
Onun sözlərini Championship.com xəbər verir.
“Bu, idmançılardan asılıdır. Təbii ki, istərdim ki, belə olsun: gerb, himn, bayraq və s. İdmançının həyatı çox qısadır. Variantların heç birində israrlı deyiləm. Ancaq seçilmisinizsə və ora neytral statusda gedirsinizsə – “onların üzünə yumruq vurun”, əsl belarus olduğunuzu göstərin. Biz təslim olmamalıyıq”, – Lukaşenko bildirib.
2022-ci il fevralın sonunda Beynəlxalq Olimpiya Komitəsi (BOK) beynəlxalq idman federasiyalarına müraciət edərək, Rusiya və Belarus idmançılarını heç bir yarışa buraxmamağı tövsiyə edib. 2023-cü ilin sonunda təşkilat rusları və belarusları neytral idmançı kimi qəbul etmək qərarına gəlib. İştirak etmək üçün onlar bir sıra tələbləri yerinə yetirməli və tələblərə cavab verməlidirlər.
