Braziliya Çinə qarğıdalı ixracına görə ilk dəfə ABŞ-ı geridə qoyub; təkcə 2023-cü ilin 11 ayında oradan 8,79 milyon ton taxıl tədarük edilib ki, bu da 22,18 milyon ton ümumi idxalın 40%-ni təşkil edib.
Bloomberg bu barədə Çin gömrük məlumatlarına istinadən xəbər verir.
ABŞ-dan tədarük keçən illə müqayisədə yarıdan çox azalıb – 6,5 milyon tona, ümumi həcmin demək olar ki, 30%-ni təşkil edir. Agentlik yazır ki, əvvəllər Çin Amerika və Ukrayna qarğıdalısından asılı idi, lakin son illərdə artan tələb fonunda idxalı diversifikasiya etməyə çalışıb.
“Braziliya rekord məhsul yığıb və qarğıdalı ucuzdur. Ölkələr həm də dostluq münasibətlərini qoruyur”, – deyə Shanghai JC Intelligence analitiki Kerry Zhang bildirib.
Treyderlər Braziliyadan tədarük üçün əvvəlcədən müqavilə bağlayıblar və taxıl hazırda limanlara gəlir. Noyabrda 2005-ci ildən bəri ən yüksək qarğıdalı idxalı qeydə alınıb.
