Emin Mahmudov “Neftçi”də qalmaq istəyir

Təcrübəli yarımmüdafiəçi bildirib ki, komandada qalması təkcə onun razılığından asılı deyil: “Klub rəhbərliyi razı olsa, “Neftçi”də qalaram. Burada oynayarkən bəzi klublardan təklif almışam. Amma ciddi bir şey olmayıb. Ona görə də ad çəkmək istəmirəm”.

O, paytaxt klubunda 8 nömrəli formanı seçməsinin səbəbini də açıqlayıb: “Ən əsası, mən gələndə 8 nömrə boş idi. Andres İnyesta da oyunçu kimi xoşuma gəlir. Buna görə də onun geyindiyi nömrəni seçdim”.

Mahmudov öz oyun üslubunu daha çox İspaniya millisinin sabiq üzvü Sesk Fabreqasa bənzətdiyini söyləyib: “Düzdür, onun səviyyəsində olmasam da, yaxşı hərəkətlərini götürməyə çalışıram. Artıq Fabreqas karyerasını bitirib. İndi Kevin De Bröyne ən çox xoşuma gələn oyunçulardan biridir”.

Qeyd edək ki, Emin Mahmudovun “Neftçi” ilə 2023-cü ilin yayınadək müqaviləsi var.

DOĞRU.AZ