Rusiyanın paytaxtı Moskvanı yenidən qar yağışı gözləyir, Ural və Sibir regionlarında isə anomal şaxtalar müşahidə olunacaq.
Baku.ws xəbər verir ki, bəzi ərazilərdə temperatur normadan 15 dərəcə aşağı enəcək. Sinoptiklər xəbərdarlıq edirlər ki, paytaxtda sabit istilər ən azı martın ortalarına qədər gözlənilmir, qar isə aprelə qədər qala bilər.
“Meteyo” proqnoz mərkəzinin rəhbəri Aleksandr Şuvalov RT-yə açıqlamasında bildirib ki, 24 və 25 fevral tarixlərində Moskvada qar yağacağı gözlənilir. 5-10 santimetr təzə qar örtüyü formalaşacaq. Sinoptikin sözlərinə görə, qar aprel ayının ikinci yarısına qədər əriməyəcək ki, bu da orta iqlim göstəricilərindən təxminən bir yarım həftə gecdir.
Martın ortalarına qədər davamlı istilərin olacağı ehtimal edilmir. Ayrı-ayrı günlərdə temperatur 0…+2 dərəcəyə qədər yüksələ bilər, lakin bunu yenidən soyuq hava dalğaları əvəz edəcək. Yaxın həftəsonu 0…+2 dərəcə gözlənilir, daha sonra temperatur yenidən -10…-5 dərəcəyədək enəcək. Bu proses zəif qar yağışı ilə müşayiət olunacaq.
Yamalo-Nenets Muxtar Dairəsində vəziyyət daha sərtdir. “Ob-İrtış UGMS”in məlumatına görə, 25 fevrala qədər bölgədə anomal şaxtalar davam edəcək və temperatur normadan 15 dərəcə aşağı olacaq. Fevralın 24-nə keçən gecə şaxta -43, açıq hava şəraitində isə -48 dərəcəyədək enəcək. Çərşənbə axşamı gündüz -28…-32, bəzi yerlərdə -37 dərəcə gözlənilir. Fevralın 25-nə keçən gecə yenidən -41, açıq havada -46 dərəcə proqnozlaşdırılır. Şimal-şərq küləyi saniyədə 11 metrə çatacaq.
DOĞRU.AZ
