Qubada Qusarçay üzərində yerləşən təmirə bağlanmış körpüyə alternativ çəkilən yolun sel yuyan hissəsinin bərpasına başlanılıb
AZƏRTAC-ın bölgə müxbiri xəbər verir ki, bölgədə yağan güclü yağışlar nəticəsində Qusarçaya gələn güclü sel iyulun 26-da alternativ yolun bir hissəsini yuyub. Bu səbəbdən hazırda Qubadan dövlət sərhədi, həmçinin Xudat şəhəri istiqamətində gedən yolda avtomobillərin hərəkəti müvəqqəti məhdudlaşdırılıb.
Qubada yerləşən “5 saylı Yol İstismarı” MMC-nin mühəndisi Rövşən Babayev AZƏRTAC-a bildirib ki, çayda suyun səviyyəsi azaldıqdan sonra körpü yaxınlığındakı alternativ yolda bərpa işlərinə başlanılıb: “Ötən gündən yolda bərpa işlərinə başlamışıq. Hazırda çayda sel suları azalıb. Texnikalarımız əraziyə cəlb olunub. Alternativ yol 2-3 gün ərzində bərpa ediləcək”.
Bakı-Quba-Rusiya Federasiyası dövlət sərhədi avtomobil yolunun 181-ci kilometrliyində Qusarçay üzərindəki körpüdə əsaslı təmir işlərinə iyul ayından başlanılıb. Uzunluğu 146, eni 10 metr olan körpünün əsaslı təmiri sentyabr ayında başa çatdırılacaq.
DOĞRU.AZ
