Paytaxtda Novruz bayramı münasibətilə Xəzər dənizi üzərində rəngarəng və yaddaqalan tədbir təşkil olunub.
Doğru.az xəbər verir ki, Gənclər və İdman Nazirliyi ilə Azərbaycan Su İdman Növləri Federasiyasının birgə təşkilatçılığı ilə keçirilən şənlik Bakı bulvarında baş tutub.
Əvvəlcə Azərbaycan bayraqları ilə bəzədilmiş skuterlər dənizdə dövrə vuraraq bayram əhvalını yüksəldib. Daha sonra yelkənli qayıqlar, kayak, kanoe, akademik avarçəkmə və draqon qayıqları sıra ilə keçid edərək izləyicilərə vizual zövq yaşadıb.
Bulvar ərazisində qurulan xüsusi trenajor zonalarında sakinlər avarçəkmə və yelkənli qayıq idmanını yerindəcə sınaqdan keçiriblər.
Tədbir çərçivəsində uşaqlar üçün viktorinalar, master-klasslar təşkil olunub, onlar Novruzun ənənəvi əyləncələrində iştirak edərək yumurta döyüşdürüb, şəkərbura bəzəyiblər. Musiqi proqramı isə bayram ab-havasını daha da gücləndirib, sakinlər rəqslərlə coşqunu bölüşüblər.
Qeyd edək ki, tədbirin əsas məqsədi su idman növlərinin təbliği, gənclərin bu sahəyə marağının artırılması və sağlam həyat tərzinin təşviqidir.
DOĞRU.AZ
