Noyabrın 17-də Bakıda Dövlət Turizm Agentliyinin təşkilatçılığı ilə ilk dəfə “Çin Ziyarətçiləri Sammiti” keçirilib.
Doğru.az xəbər verir ki, tədbir Çin və Azərbaycan turizm sənayesi nümayəndələrini bir araya gətirib.
Dövlət Turizm Agentliyinin sədri Fuad Nağıyev bildirib ki, Prezident İlham Əliyevin Çin səfəri çərçivəsində əldə olunan razılaşmalar turizm sahəsində yeni mərhələ açıb. Hazırda Azərbaycan və Çin arasında “China Ready” konsepsiyasının tətbiqi və Çində marketinq fəaliyyətlərinin genişləndirilməsi əsas istiqamətlərdədir.
Çin səfiri Lu Mey çıxışında qeyd edib ki, Çin-Azərbaycan münasibətləri 1992-ci ildən etibarən dinamik inkişaf edir və turizm bu əlaqələrin mühüm sahələrindən biridir. O, tədbirin praktiki əməkdaşlığa töhfə verdiyini vurğulayıb.
Sammit çərçivəsində Çinin 50-dən çox turizm şirkətinin nümayəndələri ilə yerli şirkətlər arasında B2B görüşlər təşkil olunub, Şamaxı, Qəbələ, Şəki və Qax rayonlarına səfərlər planlaşdırılıb. 2024-cü ildə Çindən Azərbaycana səfər edənlərin sayı 44 798 nəfər olub, 2025-ci ilin yanvar-oktyabr aylarında isə bu rəqəm 57 000-dən çoxa çatıb.
Son iki ildə Çinlə turizm əməkdaşlığının genişləndirilməsi üçün müxtəlif platformalarda tanıtım tədbirləri və media kampaniyaları həyata keçirilib, 2025-ci ildə daha geniş təqdimat və tanıtım fəaliyyətləri planlaşdırılır.
DOĞRU.AZ
