Göygöl rayonunun Keşkü kəndində bölgənin aqrar potensialının və aqroturizmin inkişafına dəstək məqsədilə “II Moruq Festivalı” və Aqrar Biznes Festivalı təşkil olunub.
Doğru.az xəbər verir ki, festival Göygöl Rayon İcra Hakimiyyəti və Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Dövlət Turizm Agentliyi, “AzerGold” QSC, Gəncə-Daşkəsən Regional Mədəniyyət İdarəsi, Kiçik və Orta Biznesin İnkişafı Agentliyi və digər dövlət və özəl qurumların dəstəyi ilə keçirilib.
Festivalın açılışında çıxış edən Göygöl Rayon İcra Hakimiyyətinin başçısı Elvin Paşayev bildirib ki, tədbir yerli istehsalçılara məhsullarını tanıtmaq və aqroturizmin inkişafı üçün geniş imkan yaradır. O, həmçinin festivalın turizm sektorunda rəqabət qabiliyyətinin artırılması, moruq istehsalının təşviqi və iqtisadi inkişaf baxımından əhəmiyyətini vurğulayıb.
Aqrar İnnovasiya Mərkəzinin direktoru Anar Cəfərov qeyd edib ki, festival fermerlər və sahibkarlar üçün məhsullarını nümayiş etdirmək, yeni satış kanalları tapmaq və təcrübə mübadiləsi aparmaq üçün əhəmiyyətli platformadır. Tədbir çərçivəsində “Aqrar sahəyə dövlət dəstəyi mexanizmləri” panel müzakirələri və kredit yarmarkası da təşkil olunub.
Festival iştirakçıları moruq və digər giləmeyvə növlərinin dequstasiyası, satış, ustad dərsləri və əyləncəli proqramlarla tanış olublar. Qeyd olunub ki, Göygöl Azərbaycanda ən çox giləmeyvə, xüsusən moruq becərilən rayonlardan biridir. Ötən il 120,5 hektar sahədə 164,6 ton məhsul yığılıb.
İki gün davam edən festivalları minlərlə qonaq ziyarət edib və bölgənin aqrar potensialını yaxından izləmə imkanı əldə edib.
DOĞRU.AZ
