İqtisadi Şuranın növbəti iclası Baş nazir Əli Əsədovun rəhbərliyi ilə keçirilib.
Nazirlər Kabinetindən bildirilib ki, iclasda 2026-cı il üzrə dövlət büdcəsinin və icmal büdcənin proqnoz layihələri, növbəti üç il üçün icmal büdcə göstəriciləri, dünya iqtisadiyyatının inkişaf meyilləri, büdcə proqnozlarında əsas fərziyyələr, cari iqtisadi vəziyyət və 2025-2029-cu illər üzrə yenilənmiş makroiqtisadi proqnozlar ətraflı müzakirə olunub.
Doğru.az xəbər verir ki, iclasda həmçinin Qarabağ və Şərqi Zəngəzurun yenidənqurulması və bərpası ilə bağlı xərclərin maliyyələşdirilməsi, “Böyük Qayıdış” Proqramının təmin edilməsi, Ortamüddətli Xərclər Çərçivəsi və nəticəəsaslı büdcə mexanizminin tətbiq olunduğu sahələr, büdcə qaydasının parametrləri üzrə hədəf göstəriciləri və makroiqtisadi sabitlik məsələləri müzakirə edilib.
İclasda iqtisadiyyat naziri Mikayıl Cabbarov, maliyyə naziri Sahil Babayev, Mərkəzi Bankın sədri Taleh Kazımov və əmək və əhalinin sosial müdafiəsi naziri Anar Əliyevin məruzələri dinlənilib. Gündəlikdəki məsələlər üzərində Şura üzvləri tərəfindən fikir mübadiləsi aparılıb.
İclasın yekununda 2026-cı ilin büdcə zərfinə daxil olan sənəd və məlumatların Azərbaycan Prezidentinə təqdim olunması üçün aidiyyəti qurumlara müvafiq tapşırıqlar verilib.
DOĞRU.AZ
