Dekabrın 2–3-də Dövlət Turizm Agentliyinin təşkilatçılığı ilə media nümayəndələrinin Şəki şəhərinə səfəri keçirilib.
Doğru.az xəbər verir ki, mediaturun məqsədi Şəkinin daxili turizm imkanlarını, bölgədə yaradılan şəraiti və həyata keçirilən layihələri geniş ictimaiyyətə təqdim etmək olub.
Səfər zamanı jurnalistlər Şəkinin Öyrət kəndində yerləşən “BioGarden” eko-aqro turizm təsərrüfatı ilə tanış olublar. Bildirilib ki, səkkiz hektarlıq ərazini əhatə edən bağda üç mindən çox meyvə ağacı və arıçılıq təsərrüfatı mövcuddur. Qeyd olunub ki, “BioGarden” 2010-cu ildən aqroekoloji turizm sahəsində fəaliyyət göstərir və əsas məqsədi bölgədə aqrobio müxtəlifliyin inkişafına nail olmaq, ekoloji təmiz kənd təsərrüfatı məhsullarını istehsal etmək və aqroturizm imkanlarını genişləndirməkdir.
Səfərin növbəti dayanacağı Şəkinin qədim ipəkçilik mərkəzlərindən olan “Azəripək” ASC olub. Jurnalistlərə müəssisənin baramadan xam ipək açan, toxucu, boyaq-bəzək, burucu və xalça sexlərinin fəaliyyəti barədə məlumat verilib. Müəssisədə 100% təbii xam ipək, kəlağayı, şərf, çitmə və digər ipək məhsullar istehsal olunur və bu məhsullar xarici ölkələrə ixrac edilir.
Media nümayəndələri həmçinin şəhərin sənətkarları ilə görüşüb, Şəki halvasının hazırlanması prosesini izləyiblər. Halvaçı Xosrov Qafarov şirniyyatın hazırlanma incəlikləri barədə danışıb. Dulusçu Əhəd Məmmədov isə öz emalatxanasında master-klas təqdim edərək əl işlərinin hazırlanma mərhələlərini göstərib.
“Yuxarı Baş” Milli Tarix-Memarlıq Qoruğuna səfər zamanı jurnalistlərə tarixi abidələr, maddi-mədəniyyət nümunələri və Şəki Xan Sarayı haqqında ətraflı məlumat verilib. Qeyd olunub ki, qoruqda cari bərpa və yenidənqurma işləri davam edir və hazırda Dairəvi Məbəddə bərpa işləri aparılır.
Mediatur çərçivəsində jurnalistlər sahibkar Sevinc Bayramovaya məxsus “Süsən” istehsalat müəssisəsində də olublar. Media nümayəndələrinə “Süsən” brendi ilə hazırlanan kəlağayılar, onların çeşidi və bazar tələbatı barədə məlumat verilib.
Səfərin sonunda media nümayəndələrinin sualları cavablandırılıb.
DOĞRU.AZ
