Türkmənistan Tacikistanla birlikdə iki dövləti Xəzər dənizinə çıxışı ilə birləşdirən nəqliyyat dəhlizi yaratmağa hazırdır.
“Neytral Türkmənistan” rəsmi qəzeti xəbər verir ki, bunu Türkmənistan prezidenti Serdar Berdiməhəmmədov Düşənbədə Tacikistanın rəhbəri Emoməli Rəhmonla danışıqları zamanı deyib.
Materialda vurğulandığı kimi, nəqliyyat sahəsində əməkdaşlıq Aşqabad və Düşənbə arasında münasibətlərin qeyd-şərtsiz prioritetidir. Berdiməhəmmədovun dediyi kimi, hər iki dövlətin səyləri əsas məqsədə, yəni Asiya, Avropa və Yaxın Şərqin nəqliyyat sistemlərinin birləşməsini təmin edən güclü və müasir infrastrukturun yaradılmasına nail olmağa yönəlməlidir.
Türkmənistan rəhbərinin fikrincə, Dünya Okeanına birbaşa çıxışı olmayan Mərkəzi Asiya dövlətləri dünya bazarlarına çıxmaq üçün Şərqi Xəzərin liman infrastrukturunun imkanlarından maksimum istifadə etməlidirlər. Berdiməhəmmədov bildirib ki, onun ölkəsi əlverişli şərtlərlə Türkmənbaşı Türkmənistan dəniz limanından Tacikistanın maraqlarına uyğun istifadəni müzakirə etməyə hazırdır.
Mənbə: TASS
Doğru.az
