Təəssüf ki, bəzi bölgələrdə unun qiymətinin artırılması ilə bağlı xəbərlər alırıq. Xüsusilə də qərb bölgəsində. Alıcılar deyirlər ki, 1 kisə unu 41 manata alırıq, satıcılar isə 39 manata satdıqlarını iddia edirlər. Halbuki rəsmi şəkildə hər hansı artımdan söhbət belə getmir.
Bir sıra bölgələrdə unun qiymətində artım var. Xüsusilə qərb bölgəsində bu mənzərə hökm sürür. Tovuz, Qazax, Ağstafa və Gədəbəy rayonlarında 50 kq-lıq əla növ unun satış qiyməti 40 manatı keçib. Alıcılar bir neçə gündür unu baha qiymətə aldıqlarını bildirirlər.
Satıcılar isə qiyməti çox artırmadıqlarını deyirlər.
Mövcud vəziyyət əksər çörəkbişirmə sexlərinə də təsir edib. Unun bahalaşması və ya mağazaların satışı dayandırması sexlərin də işini ləngidir.
Bənzər mənzərə Gəncədə də hökm sürür. Unun qiymətində əvvəlki həftələrə nisbətən 2 manata yaxın bahalaşma var.
Qeyd edək ki, bir necə gün öncə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti məlumat yayıb. Məlumatda bildirilir ki, dünyada baş verən iqtisadi və siyasi hadisələr nəticəsində qlobal və idxal bazarlarında ərzaqlıq buğdanın qiymət artımı müşahidə olunur. Bununla belə, ölkədə bayramqabağı ərzaq məhsullarına tələbatın yüksəlməsi fonunda yerli un və un məhsulları satışı bazarında mövcud vəziyyətdən sui-istifadə hallarının və qiymətlərin əsassız olaraq dəyişilməsinin qarşısının alınması məqsədilə mütəmadi monitorinqlər və ciddi nəzarət tədbirləri həyata keçirilir. Bu sahədə kartel sövdələşmələri, qiymət manipulyasiyaları və digər antiinhisar qanunvericiliyinə zidd hərəkətlərin əlamətləri aşkar edildiyi təqdirdə təxirəsalınmaz sərt addımlar atılacaq.
