Elm və Təhsil Nazirliyində yeni ali təhsil proqramlarının hazırlanması məqsədilə yaradılmış Komissiyanın növbəti iclası baş tutub. İclasa Elm və təhsil nazirinin müavini, Komissiyanın sədri İdris İsayev rəhbərlik edib.
Doğru.az xəbər verir ki, iclasda Nazirliyin rəsmiləri və Komissiyanın üzvləri iştirak ediblər. İdris İsayev çıxışında yeni təhsil proqramlarının hazırlanmasında işçi qruplarının fəal iştirakını vurğulayıb.
İclasda magistratura səviyyəsində təhsilin məzmununun yenilənməsi, ixtisaslaşmaların dəqiqləşdirilməsi və sosial-iqtisadi inkişaf tələblərinə uyğun mütəxəssis hazırlığının vacibliyi müzakirə olunub. Nazirliyin Elm, ali və peşə təhsili şöbəsinin müdiri Turxan Süleyman tərəfindən magistratura səviyyəsi üzrə ixtisaslaşmaların yeni siyahısı və çərçivə sənədinin yekun versiyası təqdim edilib. Bildirilib ki, ümumilikdə 129 ixtisas üzrə 925 ixtisaslaşma təklif olunub.
Müzakirələrdən sonra sənədlərə səsvermə yolu ilə razılıq verilib və iclas interaktiv şəkildə davam etdirilib.
Qeyd edək ki, Komissiyanın tərkibində 9 işçi qrupu yaradılıb: Təhsil, Humanitar və sosial, Mədəniyyət, İqtisadiyyat və idarəetmə, Təbiət, Texniki və texnoloji, Kənd təsərrüfatı, İdman və xidmət, Tibb və səhiyyə ixtisasları qrupları. İşçi qruplarına ali təhsil müəssisələrinin rəhbərləri və əmək bazarından nümayəndələrdən ibarət həmsədrlik mexanizmi ilə rəhbərlik edilir.
DOĞRU.AZ
