Bakının Nərimanov rayonunda, Fətəli Xan Xoyski küçəsi 5 ünvanında (“Gənclik” metro stansiyasının yaxınlığında) “Kənddən Şəhərə” adlı həftəsonu yarmarkası fəaliyyətə başlayıb. 9–11 may tarixlərini əhatə edən bu tədbirdə 20-dən artıq rayonu təmsil edən 40-dan çox fermer iştirak edir.
“Aqrar Tədarük və Təchizat” ASC-nin şöbə müdiri Nilufər Mustafaqızı bildirib ki, yarmarkanın keçirilməsində əsas məqsəd yerli fermerlər üçün alternativ satış imkanları yaratmaq, şəhər sakinlərini isə təbii, sağlam və yerli məhsullarla təmin etməkdir.
Onun sözlərinə görə, yarmarkada məhsulların qiyməti bazarla müqayisədə daha sərfəlidir, keyfiyyəti isə Azərbaycan Qida Təhlükəsizliyi Agentliyi (AQTA) tərəfindən yoxlanıldıqdan sonra satışa çıxarılır. Ərazidə Səyyar Qida Laboratoriyası da fəaliyyət göstərir.
Fermerlər tərəzi və piştaxtalarla tam ödənişsiz təmin olunublar. Onlar əvvəlcədən qeydiyyatdan keçərək 100-dən artıq çeşiddə kənd təsərrüfatı və qida məhsulunun satışını həyata keçirirlər.
İlqam Cəbiyev
DOĞRU.AZ
