Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin təşkilatçılığı ilə keçirilən Uşaq İncəsənət Festivalına yekun vurulub.
AZƏRTAC xəbər verir ki, dekabrın 26-da Heydər Əliyev Mərkəzində festivalın yekun mükafatlandırma mərasimi baş tutub. Tədbirdə Heydər Əliyev Fondunun vitse-prezidenti Leyla Əliyeva və Alena Əliyeva iştirak ediblər.
2023-cü ildən Leyla Əliyevanın təşəbbüsü ilə keçirilən festivalın məqsədi milli-mənəvi dəyərlərin gənc nəslə aşılanması, ənənəvi incəsənət sahələrinin qorunub saxlanması və gənclərin yaradıcı inkişafına dəstək göstərməkdir. Festival, həmçinin Azərbaycanın bütün bölgələrindən 6–17 yaş arası uşaqları bir araya gətirərək, onların komanda işi, səhnə mədəniyyəti və yaradıcı yanaşma bacarıqlarını inkişaf etdirir.
2025-ci ilin mart ayından start götürən builki festivala 27 mindən çox iştirakçı müraciət edib. Seçim mərhələlərinin nəticələrinə əsasən 19 fərdi və 5 kollektiv nominasiya üzrə qaliblər müəyyənləşdirilib. Beləliklə, festival üzrə ümumi qalib sayı 512 nəfər olub.
Mədəniyyət naziri Adil Kərimli bildirib ki, festival gənc istedadların müəyyən edilməsinə və onların fərdi inkişafına xidmət edən mühüm platformadır. Leyla Əliyeva qalibləri təbrik edib, onlara uğurlar arzulayıb.
Festival çərçivəsində qaliblərin solo çıxışları, duetlər və xüsusi musiqi-səhnə kompozisiyaları təqdim edilib. Rəsm nominasiyası üzrə qalib olan 10 yaşlı Melissa Quliyeva və akademik vokal üzrə birinci yer tutan 12 yaşlı Raul Hüseynov öz təəssüratlarını bölüşüblər.
Festival inklüzivlik prinsiplərinə əsaslanaraq hər bir uşağın bərabər iştirakını təmin edib. Qarmon ifaçılığı, dekorativ-tətbiqi sənət və rəssamlıq nominasiyalarında sağlamlıq imkanları məhdud olan uşaqlar da iştirak edib və qalib olublar.
Layihənin növbəti illərdə daha geniş proqramla davam etdirilməsi və minlərlə uşağın yaradıcılıq yoluna dəstək olması nəzərdə tutulur.
DOĞRU.AZ
