Dekabrın 9-da Türkmənistanın Türkmənbaşı şəhərində Qurbanqulu Berdiməhəmmədov adına Qayğıya ehtiyacı olan uşaqlara yardım üzrə xeyriyyə Fondunun Avaza filialının açılışı keçirilib.
Doğru.az xəbər verir ki, açılış mərasimində Heydər Əliyev Fondunun vitse-prezidenti Leyla Əliyeva və Fondun tibb sahəsi üzrə vitse-prezidenti Oğulcahan Atabayeva iştirak ediblər.
Oğulcahan Atabayeva çıxışında Fondun irimiqyaslı və səmərəli fəaliyyətindən danışaraq, yüzlərlə çətin tibbi əməliyyatların həyata keçirildiyini və bir sıra tibb müəssisələrinin müasir avadanlıqlarla təmin olunduğunu qeyd edib. O, həmçinin filialda uşaqlara yüksəkkeyfiyyətli tibbi yardım, istirahət və reabilitasiya şəraitinin yaradıldığını vurğulayıb və BMT-nin Davamlı İnkişaf Məqsədlərinə dəstək verəcəklərini bildirib.
Qeyd edək ki, Fond 2021-ci ildə yaradılıb və əsas məqsədi uşaqlara dəstək olmaq, onların sağlamlığını bərpa etmək və yaşayışı üçün münbit şərait yaratmaqdır. Bu günə qədər Fondun vəsaiti ilə Türkmənistan və digər ölkələrdə bir sıra humanitar layihələr həyata keçirilib, həmçinin Türkiyə, Ukrayna, Rusiya, Əfqanıstan, Tacikistan və Fələstində fəlakətlərdən zərər çəkmiş uşaqlara yardımlar göndərilib.
DOĞRU.AZ
