İndoneziyanın xarici işlər naziri Retno Marsudi bildirib ki, İndoneziya İsraillə təmasda olan dövlətləri Qəzza zolağında yəhudi dövlətinin hərəkətlərinə təsir göstərməyə çağırır.
Onun sözlərinə görə, Cakarta Təl-Əvivin İndoneziya klinikası da daxil olmaqla bölgədəki xəstəxanalara hücumlarını pisləyir.
“Bütün ölkələr, xüsusən də İsraillə yaxın əlaqələri olan ölkələr bütün təsir və imkanlarından istifadə edərək İsraili vəhşiliklərini dayandırmağa çağırmalıdırlar”, – deyə Marsudi bildirib.
Oktyabrın əvvəlində Fələstin HƏMAS qüvvələri Əl-Əqsa Daşqını əməliyyatının başladığını elan edərək, İsrailə böyük raket hücumu həyata keçirib. Hücum çərçivəsində minlərlə yaraqlı yəhudi dövlətinin ərazisinə daxil olub, hərbi texnikanı ələ keçirib və yüzdən çox insanı əsir götürüb. Buna cavab olaraq İsrail Qəzza zolağında HƏMAS-ı məhv edəcəyinə söz verərək Dəmir Qılınclar əməliyyatına başlayıb. Yəhudi dövlətinin hərəkətləri Fələstin anklavının blokadasına, kütləvi bombardmanlara və 1 milyondan çox insanın bölgənin cənubuna köçürülməsi tələbinə səbəb olub.
Mənbə: A haber
