Avqustun 28-də Heydər Əliyev Fondu tərəfindən Şamaxının İkinci Cabanı və Böyük Xınıslı kəndlərində inşa olunan körpələr evi-uşaq bağçalarının açılışı keçirilib.
Doğru.az xəbər verir ki, açılışda Heydər Əliyev Fondunun vitse-prezidenti Leyla Əliyeva iştirak edib. O, bağçaların otaqları ilə tanış olub, uşaqlar üçün yaradılan şəraitə baxış keçirib.
Məlumata görə, hər iki bağça kəndlərin mərkəzində yerləşir. Müasir və tam təchizatlı məktəbəqədər təhsil müəssisələrində yataq və oyun otaqları, idman və musiqi zalları, tibb otağı, yeməkxana və digər inzibati, texniki otaqlar mövcuddur. Bağçalar zəruri mebel və avadanlıqlarla tam təchiz edilib, həyətyanı ərazilərdə yaşıllaşdırma işləri aparılıb və uşaq əyləncə qurğuları quraşdırılıb.
İkinci Cabanı kənd körpələr evi-uşaq bağçasının rəhbəri Töfə Bəşirova bildirib ki, illərdir belə şərait olmayıb: “Köhnə bağça yararsız vəziyyətə düşdüyündən fərdi evdə fəaliyyət göstərirdik. Heydər Əliyev Fonduna müraciət etdik, qısa müddət ərzində yeni bağça inşa olunub təhvil verildi. Sabahdan uşaqları qəbul edə biləcəyik. Yeni bağçada 1-3 və 4-6 yaş qrupları fəaliyyət göstərəcək. Qonşu kəndlərdən də müraciətlər var. Uşaqlarımız üçün yaradılan şəraitə görə Fonduna dərin minnətdarlığımızı bildiririk”.
Leyla Əliyeva daha sonra Şamaxı və Ağsuda bir neçə ailəni də ziyarət edib.
DOĞRU.AZ
