İspaniya hakimiyyəti Seutada miqrant böhranından bir neçə həftə əvvəl miqrant axınının kəskin arta biləcəyi barədə xəbərdarlıqlar alıb.
Doğru.az xəbər verir ki, bu barədə “Reuters” sərhəd işçilərinin həmkarlar ittifaqlarına istinadən məlumat yayıb.
Həmkarlar ittifaqlarının məlumatına görə, xəbərdarlıqlardan sonra hakimiyyət yalnız məhdud tədbirlər görüb. İyunun sonunda İspaniya məhkəməsi fiziki maneəni keçərək Seutaya daxil olan miqrantların dərhal geri qaytarılmasına icazə verib. Lakin bu qərar üzərək anklava çatan miqrantlara şamil edilməyib.
“Reuters”in məlumatına görə, məhkəmə qərarı barədə xəbərlər və Seutaya uğurla çatan miqrantların sosial şəbəkələrdə yayılan görüntüləri digər şəxsləri də eyni marşrutdan istifadə etməyə təşviq edib.
İspaniya Mülki Qvardiyasının Seutadakı həmkarlar ittifaqı nümayəndəsi Raçid Sbihi bildirib ki, miqrant axınının miqyasını əvvəlcədən heç kəs təsəvvür edə bilməzdi.
İspaniya Daxili İşlər Nazirliyi isə “Reuters”ə açıqlamasında bildirib ki, məhkəmə qərarından sonra müxtəlif variantlar nəzərdən keçirilib. Nazirliyin sözlərinə görə, miqrant axınının artması fonunda üzən baryer qərardan 48 saat sonra quraşdırılıb.
Bundan əvvəl Mərakeş hakimiyyəti Fnidek şəhəri ilə Bab Ceuta sərhəd keçid məntəqəsi arasındakı ərazidə təxminən 4 metr hündürlüyündə baryerin quraşdırılmasına başlayıb.
Miqrasiya böhranının Seuta şəhərinin iqtisadiyyatına təxminən 17,9 milyon avro ziyan vurduğu bildirilir.
DOĞRU.AZ
