“Qarabağ”ın Konfrans Liqasının pley-off mərhələsindəki rəqibi “Tvente” Niderland mətbuatında sərt tənqid olunub.
Sportinfo.az xəbər verir ki, buna komandanın 3-cü təsnifat mərhələsində Slovakiyadan DAK-1904 ilə cavab oyunundakı (3:3) çıxışı səbəb olub.
“Utancverici nəticə ilə pley-offa yüksəldilər”
Bu başlıqla məqalə yayan “De Telegraaf” nəşri yazır ki, Enshededə ilk matçda 6:0 hesabı ilə qalib gələn “Tvente”nin baş məşqçisi Con van den Brom cavab görüşünə eksperimental heyət buraxıb.
Niderland təmsilçisi Maks Bruns və Marko Pyatsanın qolları ilə 2:0 önə keçsə də, ikinci hissədə oyunun səviyyəsi kəskin şəkildə aşağı düşüb.
DAK ardıcıl 3 qol vuraraq hesabda önə keçib (qollardan birini bu yay “Qəbələ”dən transfer edilən Prins Ovusu vurub). “Tvente” yalnız uzatma dəqiqələrində rəqib qapıçının səhvindən sonra Pyatsanın qolu ilə məğlubiyyətdən xilas olub – 3:3.
Nəşr komandanın çıxışını “biabırçı” adlandıraraq yazıb: “Tvente”nin oyunu heç nəyə bənzəmirdi”.
DOĞRU.AZ
