Kitab festivalları, ənənəvi olaraq, kitablara marağı olan və oxucularla yayımcılar arasında əlaqə yaradan mühüm bir hadisədir. Kitab festivalı, dərin mənanın, bədii incəsənətin və fikirlərin paylaşılmasını həyata keçirən ən gözəl tədbirlərdən biridir. Festivallar, oxucularla, yazarlarla və yaradıcı insanlarla bir araya gəlmə şansı verir, eyni zamanda bir neçə gün boyu oxucuları müxtəlif kitablar təqdim edilir.
Doğru.az xəbər verir ki, bu gün Bakıda gözlənilən kitab festivalı öz qapılarını oxuyucularının üzünə açıb. I Bakı Kitab Festivalı, Bakı İdman Sarayında “Azərbaycan Nəşriyyatçılar Assosiasiyası” İctimai Birliyi (ANAİB) tərəfindən Mədəniyyət Nazirliyi ilə birgə təşkil edilib.
Festival “Yeni ilə yeni kitablarla!” şüarı altında keçirilir. Burada ANAİB üzvləri də daxil olmaqla 30-dan çox nəşriyyat təmsil olunur. Festivalda, həmçinin yerli qəzet və jurnallar öz çap məhsullarını nümayiş etdirir.
Festivalın açılış mərasimində Xalq şairi Sabir Rüstəmxanlı, Mədəniyyət Nazirliyi yanında İctimai Şuranın sədri, Azərbaycan Atatürk Mərkəzinin direktoru akademik Nizami Cəfərov, Milli Məclisin deputatı Fazil Mustafa, Mətbuat Şurasının sədri Rəşad Məcid və Azərbaycanın Əməkdar artisti Rafiq Həşimov çıxışlarında kitab və mütaliənin əhəmiyyətini, cəmiyyətin inkişafındakı rolunu vurğulayıb, eləcə də təhsilin əhəmiyyətini diqqətə çatdırıblar.
