Bakıda İrəvan Dövlət Azərbaycan Dram Teatrının binası əsaslı təmir və yenidənqurmadan sonra istifadəyə verilib.
Doğru.az xəbər verir ki, açılış Prezident İlham Əliyevin müvafiq Sərəncamına əsasən həyata keçirilən yenidənqurma işlərinin başa çatması ilə əlaqədar təşkil olunub. Tədbirdə teatr kollektivi, mədəniyyət xadimləri, Qərbi Azərbaycan İcmasının nümayəndələri və Milli Məclisin deputatları iştirak ediblər.
Məlumata görə, 3000 kvadratmetrlik binada səhnə müasir standartlara uyğunlaşdırılıb, yeni kiçik səhnə yaradılıb, işıq və səs sistemləri yenilənib. Tamaşaçı zalının akustikası təkmilləşdirilib, məşq zalları, qrim otaqları və texniki xidmət sahələri qurulub.
Mədəniyyət naziri Adil Kərimli bildirib ki, bu bina yalnız teatr fəaliyyəti üçün deyil, həm də Azərbaycan teatr ənənələrinin və Qərbi Azərbaycan yaddaşının yaşadılması baxımından mühüm əhəmiyyət daşıyır.
Çıxış edənlər yeni binanın mədəniyyətimizin inkişafına verilən yüksək dəyərin göstəricisi olduğunu vurğulayıb, Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
DOĞRU.AZ
