Bəhreyn Krallığında keçirilən “Mara’ee 2025” tədbiri ölkənin qədim ənənələrini, təsərrüfat mədəniyyətini və müasir yanaşmanı bir araya gətirən nüfuzlu festival kimi qiymətləndirilir. “Mara’ee” sözü otlaq və geniş yaşayış sahələri mənasını ifadə edir və Bəhreyn cəmiyyətinin əsrlər boyu formalaşmış həyat tərzini əks etdirir.
Doğru.az xəbər verir ki, builki festivalda Azərbaycan nümayəndə heyətinin təqdim etdiyi proqram tədbirin ən parlaq məqamlarından biri olub. Dövlət Sərhəd Xidmətindən (DSX) bildirilib ki, səhnədə süvarilərin çıxışı, orkestrin ifası və milli rəqs qruplarının kompozisiyası vahid konsepsiya üzrə hazırlanaraq böyük maraq doğurub.
Bir-birini tamamlayan səhnə nömrələri enerjisi, estetikasının yüksəkliyi və emosional təsiri ilə festivalın ən uzun və yaddaqalan proqramlarından biri kimi dəyərləndirilib.
Məlumata görə, Bəhreyn Kralı Həmd bin İsa Al Xəlifə tədbirdə iştirak edərək Azərbaycan kollektivinə təşəkkürünü bildirib və proqramdan aldığı müsbət təəssüratları qeyd edib.
Azərbaycan nümayəndə heyətinin “Mara’ee 2025” səhnəsindəki çıxışı ölkəmizin mədəniyyətinin beynəlxalq arenada tanıdılmasına mühüm töhfə verib.
DOĞRU.AZ
