Aktauda qəzaya uğrayan təyyarədəki dəliklərin mənşəyi barədə ilkin məlumatlara əsaslanaraq tələsik nəticə çıxarmağın mənası yoxdur. Bunu Qazaxıstan baş nazirinin müavini Kanat Bozumbayev deyib.
ORDA informasiya-analitik portalının Telegram kanalı xəbər verir ki, o, təyyarənin quyruğunda “atəş izlərinə bənzəyən” zədənin göründüyü videoya belə reaksiya verib.
“Mən vaxtından əvvəl açıqlamalar verməyə cəsarət etmirəm. Hətta ilkin nəticələr də mümkün deyil… Hələlik mən əsassız heç nə deyə bilmərəm”, – Bozumbayev kanalda bildirib.
O, mütəxəssislərin lazımi işləri və müayinələri aparacağını vurğulayıb. Onun sözlərinə görə, Qazaxıstan hakimiyyəti artıq təyyarə qəzası ilə bağlı cinayət işi açıb.
Çərşənbə günü, dekabrın 25-i günorta saatlarında Bakıdan Qroznıya uçan Azərbaycan Hava Yollarına məxsus təyyarə qəzaya uğrayıb. Təyyarənin qəzaya uğramasının ilkin səbəbi təyyarənin quş sürüsü ilə toqquşması olub.
DOĞRU.AZ
