Azərbaycan Respublikasının Prezidenti İlham Əliyevin 2008-ci il 9 oktyabr tarixli Sərəncamına əsasən, hər il noyabrın 1-i ölkəmizdə Kənd Təsərrüfatı İşçiləri Günü kimi qeyd olunur.
Doğru.az xəbər verir ki, son illərdə aqrar sahədə mühüm nailiyyətlər əldə edilib. Fermerlərə dövlət dəstəyi gücləndirilib, subsidiyalar, güzəştli kreditlər və müasir texnologiyalar vasitəsilə məhsuldarlığın və ərzaq təhlükəsizliyinin artırılması təmin olunub.
Prezident İlham Əliyevin rəhbərliyi ilə kənd təsərrüfatının institusional və texnoloji inkişaf mexanizmləri təkmilləşdirilib. Bu islahatlar nəticəsində istixana kompleksləri, avtomatlaşdırılmış suvarma sistemləri və aqrar texnikanın yenilənməsi həyata keçirilib.
Rəqəmlər də inkişafı göstərir: 2025-ci ilin ilk rübündə kənd təsərrüfatı məhsullarının ümumi dəyəri 2,3 milyard manatı ötüb, bu da ötən illə müqayisədə 1,8 faiz artım deməkdir. Dövlətin aqrar sahəyə ayırdığı vəsait isə 773 milyon manat olub — bu, 16 faiz artım göstəricisidir.
Fermerlərə göstərilən maliyyə və texniki dəstək, aqrar sığorta sisteminin genişləndirilməsi və suvarma layihələrinin yenilənməsi kənd təsərrüfatında sabit inkişafı təmin edib. Təkcə 2024-cü ildə 380 mindən çox fermerə ümumilikdə 362 milyon manat subsidiya ödənilib.
İşğaldan azad olunmuş ərazilərdə də kənd təsərrüfatının bərpası istiqamətində əhəmiyyətli işlər görülür. 2025-ci ildə bu bölgələrdə 12 500 hektar torpaq istifadəyə verilib, Zəngilan və Qubadlıda isə 40 illik icarə əsasında 4 700 hektar sahə fermerlərə təqdim olunub.
Beləliklə, aqrar sektorun inkişafı ölkənin dayanıqlı ərzaq təminatının, regionların sosial rifahının və iqtisadi sabitliyin əsas dayaqlarından birinə çevrilib.
DOĞRU.AZ
