Kənd Təsərrüfatı Nazirliyində “Azərbaycanda kənd təsərrüfatı” fotomüsabiqəsinin nəticələri açıqlanıb və qaliblərin iştirakı ilə mükafatlandırma mərasimi keçirilib.
Doğru.az xəbər verir ki, müsabiqə Nazirlik, Aqrar Sığorta Fondu, “Agrodairy” şirkəti və Azərbaycan Fotoqrafları Birliyinin birgə təşkilatçılığı ilə reallaşıb. Məqsəd bölgələrdə kənd təsərrüfatı ilə məşğul olan insanların həyatını, zəhmətini və aqrar peşələrin dəyərini cəmiyyətə tanıtmaq olub.
Müsabiqəyə minə yaxın foto təqdim olunub. Şəkillər kənd həyatı, əkin-biçin, məhsul yığımı, texnika, heyvandarlıq kimi mövzuları əhatə edib. Fotolar kamera ilə yanaşı, smartfon və dron vasitəsilə də çəkilib.
Tədbirdə çıxış edən kənd təsərrüfatı nazirinin müavini Elçin Zeynalov bu cür müsabiqələrin kənd təsərrüfatına sənət gözü ilə baxış yaratdığını və fermerlərin əməyini daha geniş auditoriyaya çatdırdığını qeyd edib.
Münsiflərin qiymətləndirməsinə əsasən qaliblər müəyyənləşib:
🔸 I yer – Vüqar İbadov (“Böyük torpağın balaca sahibi – Xocalı sakini”)
🔸 II yer – İlham Mustafayev (“Yamacda sürü”)
🔸 III yer – Cavid Rzayev (“Çoban və quzu”)
Qaliblərə diplom və pul mükafatları təqdim olunub.
Bundan başqa, sərgidə nümayiş olunan və fərqlənən 5 foto da xüsusi seçilib:
– “Kök yığan qadın” – Famil Mahmudbəyli
– “Pambıq emalı” – Elxan Qəniyev
– “Kürdəmirdə qarpız yığımı” – Ramil Zeynalov
– “Günəbaxanlar” – Cavid Abdullayev
– “Balıq ovu” – Kürçaylı Məmmədov
Ümumilikdə 30 müəllif müxtəlif dərəcəli pul mükafatları ilə təltif edilib.
Müsabiqə kənd həyatının fotoobyektiv vasitəsilə sənədləşdirilməsi və ictimai dəyərin artırılması baxımından böyük maraqla qarşılanıb.
DOĞRU.AZ
