Dekabrın 17-də Elm və Təhsil Nazirliyinin təşkilatçılığı ilə “Elm və təhsil obyektivdə” foto-video müsabiqəsinin qaliblərinin mükafatlandırılması mərasimi keçirilib.
Doğru.az xəbər verir ki, Bakı Fotoqrafiya Evində baş tutan tədbirdə Elm və Təhsil Nazirliyinin və Elm və Təhsil İşçiləri Həmkarlar İttifaqının rəsmiləri, deputatlar, münsiflər heyətinin üzvləri, media nümayəndələri, müsabiqə iştirakçıları və digər qonaqlar iştirak ediblər.
Tədbirdən əvvəl müsabiqə çərçivəsində seçilmiş foto və video işlərdən ibarət sərgiyə baxış keçirilib. Eyni zamanda, müsabiqənin münsiflər heyətinin sədri, Ümummilli Lider Heydər Əliyevin şəxsi fotoqrafı olmuş Rafiq Bağırovun müəllifi olduğu “Heydər Əliyev və təhsil” mövzusunda fotoguşə təqdim edilib. Guşədə Ulu Öndərin müxtəlif təhsil müəssisələrində şagird və tələbələrlə birlikdə çəkilmiş 30-a yaxın fotosu nümayiş olunub.
Mükafatlandırma mərasimində çıxış edən elm və təhsil nazirinin müavini Firudin Qurbanov foto və videonun tarixi yaşadan, yaddaşı qoruyan mühüm vasitə olduğunu bildirib. O qeyd edib ki, foto yalnız görüntü deyil, həm də emosiyaları və hissləri ötürən güclü bir ifadə vasitəsidir. Nazir müavini Ulu Öndər Heydər Əliyevin təhsil sahəsinə xüsusi diqqət və qayğı göstərdiyini, bu siyasətin Prezident İlham Əliyev tərəfindən uğurla davam etdirildiyini vurğulayıb.
Deputat Elçin Mirzəbəyli isə çıxışında foto və video sənətinin gələcək nəsillərə tarixi ötürmək baxımından əvəzsiz rol oynadığını qeyd edərək, bu cür müsabiqələrin fotoqrafiya və vizual sənətin inkişafına töhfə verdiyini bildirib.
Münsiflər heyətinin sədri Rafiq Bağırov Elm və Təhsil Nazirliyinə təşəkkür edərək, Ulu Öndərin şəxsi fotoqrafı olduğu illərlə bağlı xatirələrini bölüşüb və bu təşəbbüsün tarixi yaddaşın qorunmasına mühüm töhfə verdiyini vurğulayıb.
Daha sonra qaliblərə diplom və mükafatlar təqdim olunub. Foto kateqoriyası üzrə ilk üç yerin qalibləri diplomlarla təltif edilib, ən yaxşı beş işin müəlliflərinə həvəsləndirici sertifikatlar verilib. Video kateqoriyası üzrə isə ilk üç yerin qaliblərinə diplomlar təqdim olunub. Digər iştirakçılar da sertifikatlarla təltif ediliblər.
Qeyd edək ki, Azərbaycan milli mətbuatının 150 illik yubileyinə həsr olunan müsabiqə foto və video olmaqla iki kateqoriya üzrə keçirilib. Müsabiqəyə ümumilikdə 100-ə yaxın müraciət daxil olub, 245 iş qəbul edilib. Tədbir Elm və Təhsil İşçiləri Həmkarlar İttifaqının tərəfdaşlığı, Təhsil TV və “Azərbaycan müəllimi” qəzetinin dəstəyi ilə təşkil olunub.
Müsabiqənin əsas məqsədi elm və təhsil sahəsində baş verən proseslərin yaradıcı və keyfiyyətli vizual məzmun vasitəsilə təqdim olunmasını təşviq etməkdir.
DOĞRU.AZ
