Bu gün kənd təsərrüfatı naziri Məcnun Məmmədov Qəbələ Dövlət Aqrar İnkişaf Mərkəzində Qəbələ, Şəki, Oğuz, Qax, Zaqatala və Balakən rayonlarından olan vətəndaşlarla görüş keçirib.
Doğru.az xəbər verir ki, görüşdə nazirliyin idarə və tabeli qurumlarının rəhbər şəxsləri də iştirak ediblər. Vətəndaşların müraciətləri əsasən işlə təminat, işğaldan azad olunmuş ərazilərdə torpaq sahəsinin ayrılması, heyvandarlıq təsərrüfatlarının həmin ərazilərə köçürülməsi, subsidiyaların ödənişi, tütün məhsulunun tədarükü və suvarma ilə bağlı məsələləri əhatə edib.
Nazir Məcnun Məmmədov hər bir vətəndaşı diqqətlə dinləyib, qaldırılan məsələlərin operativ araşdırılması və qanunvericiliyə uyğun şəkildə həlli üçün aidiyyəti şəxslərə tapşırıqlar verib. Müraciətlərin bir qismi yerində həll olunub, digərləri isə nəzarətə götürülüb.
Nazirliyin səlahiyyətlərinə aid olmayan müraciətlər isə aidiyyəti qurumlara çatdırılması üçün qeydiyyata alınıb.
DOĞRU.AZ
