Xocalı rayonunun Ballıca və Xanyurdu kəndlərində kənd təsərrüfatı təyinatlı torpaqların əkin məqsədilə istifadəyə verilməsi üçün müraciətlərin qəbuluna bu gündən etibarən başlanılıb.
Doğru.az-a bu barədə Kənd Təsərrüfatı Nazirliyindən məlumat verilib.
Bildirilib ki, müraciətlər Elektron Kənd Təsərrüfatı İnformasiya Sistemi (EKTİS) – eagro.az platforması vasitəsilə elektron şəkildə qəbul olunur və proses 30 iyun tarixinədək davam edəcək.
Torpaqların icarəyə verilməsi Azərbaycan Respublikası Prezidentinin 2024-cü il 27 noyabr tarixli 236 nömrəli Fərmanı və Nazirlər Kabinetinin 26 dekabr 2024-cü il tarixli 544 nömrəli Qərarı ilə təsdiqlənmiş
“İşğaldan azad edilmiş ərazilərdə torpaqların icarəyə verilməsi Qaydaları”na uyğun olaraq həyata keçirilir.
Əkin üçün ayrılan torpaqlar:
Minimum 5 hektar, suvarılan və əkinə hazır vəziyyətdədir;
Sahələr kəndlərin ətrafında yerləşir;
Əkin üçün nəzərdə tutulan bitkilər: alma, armud, gilas, qoz, şaftalı, pomidor, xiyar, buğda, arpa, qarğıdalı və s.;
Müasir damlama və çiləmə suvarma sistemləri tətbiq olunmalıdır.
Torpaq üçün kimlər müraciət edə bilər?
Ballıca və Xanyurdu kəndlərində məskunlaşan və faktiki yaşayan şəxslər;
İştirakçılar EKTİS-də qeydiyyatdan keçməli və elektron kabinetlərində “Torpaq icarəsinə müraciət” bölməsində ərizə doldurmalıdırlar;
Şəxsiyyət vəsiqəsindəki qeydiyyatdan asılı olmayaraq, “e-polis” tətbiqində faktiki yaşayış ünvanı Ballıca və ya (kəndə köçdükdən sonra) Xanyurdu kimi göstərilməlidir.
Əlavə mərhələlər və müqavilələr:
1 iyul – 31 avqust tarixlərində müqavilələrin imzalanması, təlimlər və sahələrin yerində tanıdılması planlaşdırılır;
İcarə müddəti:
Birillik əkinlər və yonca üçün – 2 il
Çoxillik bitkilər üçün – 5 il
Müddət istifadə göstəricilərinə əsasən uzadıla bilər.
Xatırladaq ki, azad edilmiş ərazilərdə torpaqların istifadəyə verilməsi prosesi ilk dəfə Zəngilanın Ağalı kəndindən başlayıb.
Müraciət üçün platforma: www.eagro.az
DOĞRU.AZ
