DÇ-2026-nın püşkatma mərasimində iştirak üçün ABŞ-ın Vaşinqton şəhərində olan AFFA-nın prezidenti Rövşən Nəcəf Pakistan Futbol Federasiyasının (PFF) prezidenti Mohsen Gilani ilə görüşüb.
Doğru.az xəbər verir ki, görüş zamanı iki assosiasiya arasında futbol sahəsində əməkdaşlığı genişləndirmək məqsədilə Anlaşma Memorandumu imzalanıb. Memorandum çərçivəsində təlim-məşq toplanışları, milli komandalar arasında yoldaşlıq oyunları, qadın futbolu, futzal, çimərlik və əlillər futbolu, həmçinin hakimlərin mübadiləsi və təhsili sahəsində əməkdaşlıq nəzərdə tutulur.
Sənəd hər iki ölkədə futbolun inkişafına, gənc futbolçular və məşqçilər üçün yeni imkanların yaradılmasına, AFFA və PFF arasında dostluq və qarşılıqlı etimadın güclənməsinə xidmət edəcək.
DOĞRU.AZ
