Balıqçılıq və akvakultura sahəsində dövlət siyasətinin daha səmərəli və sistemli şəkildə həyata keçirilməsi məqsədilə “Balıqçılıq və Akvakultura Mərkəzi” publik hüquqi şəxs yaradılıb.
Doğru.az xəbər verir ki, bunu Balıqçılıq və Akvakultura Mərkəzinin direktoru Ceyhun Əliyev mətbuat konfransında çıxışı zamanı bildirib. Onun sözlərinə görə, mərkəz Azərbaycan Respublikası Prezidentinin 2024-cü il 19 dekabr tarixli Fərmanına əsasən yaradılıb və Kənd Təsərrüfatı Nazirliyinin tabeliyində fəaliyyət göstərir.
Direktor qeyd edib ki, mərkəzin əsas fəaliyyət istiqamətləri balıq ovunun dayanıqlı və elmi əsaslarla həyata keçirilməsi, eləcə də ölkədə akvakultura sahəsinin inkişaf etdirilməsidir. Bu çərçivədə istehsal potensialının artırılması, müasir texnologiyaların tətbiqi və təsərrüfatların stimullaşdırılması prioritet hesab olunur.
Ceyhun Əliyev bildirib ki, 2025-ci ilin oktyabr ayında Xəzər dənizi və daxili su hövzələrində balıq ehtiyatlarının elmi əsaslarla qiymətləndirilməsi məqsədilə genişmiqyaslı ekspedisiya həyata keçirilib. Tədqiqatlar zamanı balıq növlərinin bioloji göstəriciləri, miqrasiya marşrutları və ehtiyat vəziyyəti öyrənilib.
Onun sözlərinə görə, aparılan hesablamalara əsasən, balıq ehtiyatlarının bərpası üçün daxili su hövzələrinə hər il 6–12 milyon, Xəzər dənizinə isə 11–23 milyon körpə balığın buraxılmasına ehtiyac var. Ekspedisiyanın nəticələri 2026-cı il üçün ov kvotalarının müəyyənləşdirilməsində əsas baza kimi istifadə olunub.
Mərkəzin rəhbəri əlavə edib ki, 2025-ci il ərzində təbii mühitə yüz minlərlə nərəcinsli balıq və milyonlarla digər balıq növləri buraxılıb, qanunsuz balıq ovuna qarşı nəzarət tədbirləri gücləndirilib.
Qeyd olunub ki, “Balıqçılıq haqqında” Qanunun yeni redaksiyası hazırlanıb və bu sənəd sahədə fəaliyyət göstərən subyektlər üçün daha şəffaf və səmərəli hüquqi mühitin formalaşdırılmasına xidmət edəcək.
DOĞRU.AZ
