Doğru.az xəbər verir ki, iyunun 23-də Heydər Əliyev Fondunun vitse-prezidenti, IDEA İctimai Birliyinin rəhbəri Leyla Əliyeva və Bakı Media Mərkəzinin direktoru Arzu Əliyeva Xızı rayonunda olublar.
Səfər çərçivəsində Leyla Əliyevanın təşəbbüsü ilə əsaslı şəkildə yenilənmiş Uşaq-Gənclər İdman-Şahmat Məktəbinin açılışı baş tutub. Müasir tələblərə cavab verən məktəb binasında uşaqlar üçün zəruri şərait yaradılıb, intellektual bacarıqların inkişafına yönəlmiş dərs avadanlıqları ilə təmin edilib.
Leyla Əliyeva məktəbin fəaliyyəti ilə tanış olub, şahmat dərslərinin təşkili barədə məlumat alıb və şagirdlərlə səmimi söhbət edib. O, uşaqların dərslərindəki uğurları ilə maraqlanıb və məktəblilərə hədiyyələr təqdim olunub.
Səfər çərçivəsində həmçinin Giləzi qəsəbəsində 100-ə yaxın uşağa idman geyimləri və futbol topları verilib.
Bu təşəbbüslər regionda uşaq və yeniyetmələrin fiziki və intellektual inkişafına dəstək məqsədi daşıyır.
DOĞRU.AZ
