22 May – Beynəlxalq Bioloji Müxtəliflik Günü münasibətilə Neftçalada əlamətdar ekoloji təşəbbüs həyata keçirilib. “LU-MUN Holding”in törəmə şirkəti olan “Azerbaijan Fish Farm” MMC tərəfindən Xəzər dənizinə 100.000 nərə və 20.000 Xəzər qızılbalığı buraxılıb.
Doğru.az xəbər verir ki, Neftçala Olimpiya Kompleksində baş tutan tədbirdə 170-dən çox qonaq iştirak edib. Qonaqlar arasında kənd təsərrüfatı naziri Məcnun Məmmədov, Ekologiya və Təbii Sərvətlər Nazirliyi, müxtəlif dövlət qurumları, səfirliklər, QHT-lər və biznes nümayəndələri yer alıblar.
Tədbir çərçivəsində çıxış edən Məcnun Məmmədov Prezident İlham Əliyevin imzaladığı fərmana əsasən ölkədə Balıqçılıq və Akvakultura Mərkəzinin yaradıldığını və bu təşəbbüsün biomüxtəlifliyin qorunması üçün strateji əhəmiyyət daşıdığını bildirib.
Neftçala RİH başçısı Mirhəsən Seyidov isə Ümummilli Lider Heydər Əliyevin ekologiyaya verdiyi önəmi və bu siyasətin bu gün Prezident İlham Əliyev tərəfindən uğurla davam etdirildiyini vurğulayıb.
“LU-MUN Holding” İdarə Heyətinin sədri Emil Məmmədsadıxov və “Azerbaijan Fish Farm” şirkətinin direktoru Nurlan Abdinov tədbirin ölkədə ekoloji balansın bərpası və dayanıqlı akvakulturanın inkişafı baxımından mühüm addım olduğunu bildiriblər. Nurlan Abdinov qeyd edib ki, qarşıdakı illərdə bu rəqəmin 1 milyon balığa çatdırılması hədəflənir.
Layihənin reallaşmasına AZAL, SOCAR, Azerbaijan Poultry Company, Wings, Gilan Holding, CMS Properties, Alltech Coppens kimi strateji tərəfdaşlar dəstək verib.
AZAL prezidentinin müşaviri Fidan Fərzəliyeva isə bildirib ki, bu təşəbbüs AZAL-ın “Sıfıra Yaxın Emissiya” planının bir hissəsi olaraq şirkətin ESG strategiyası çərçivəsində həyata keçirilir.
Tədbirin sonunda iştirakçılar Kür Təcrübi Nərə Balıqartırma Zavodunu ziyarət edərək dayanıqlı akvakultura sahəsində görülən işlərlə tanış olublar.
DOĞRU.AZ
